Kjo është beteja ime për të mos u kthyer në emigracion. Motivimi i fortë pas denoncimeve të inxhinierit në SPAK
E Mërkurë 1 Tetor 2025, 09:09
Dritare.net
Një kallëzim i bërë në SPAK në vitin 2020 nga inxhinieri Romeo Nazarko ka vënë nën hetim projektin e ndërtimit të rrugës Qafë Zezë-Qafë Qar në Kolonjë. Sipas Nazarkos, i cili është banor i zonës dhe inxhinier, projekti origjinal ishte fiktiv dhe i papërshtatshëm për terrenin, duke injoruar elemente thelbësore si ujërat nëntokësore, gjë që çoi në shembjen e një segmenti të rrugës. Kallëzimi pretendon se aksi i rrugës u ndryshua pa arsye teknike bindëse nga gjurma historike, e cila lidhte fshatrat, në një gjurmë të re paralele.
Përtej fakteve teknike dhe juridike, motivimi i inxhinierit Romeo Nazarko për të denoncuar tre raste të mëdha korrupsioni në SPAK buron nga një arsye thellësisht personale dhe patriotike. Si një ish-emigrant i kthyer në Shqipëri 20 vite më parë, ai shprehet se ka "tmerr" nga mendimi se një ditë mund të detyrohet të largohet sërish. Kjo frikë e ka shtyrë të mos qëndrojë indiferent përballë padrejtësive, por të bëjë "betejën e tij këtu", në vendin e tij.
Ai e sheh aktivizmin qytetar si mënyrën e vetme për të kontribuar në ndërtimin e një shteti funksional dhe për të mbrojtur të ardhmen e përbashkët. Ky qëndrim sfidon mentalitetin e përhapur "ç'më duhet mua" dhe shërben si një thirrje për përgjegjësi qytetare, duke argumentuar se nëse qytetarët nuk luftojnë për vendin e tyre, askush nuk do t'i ndalë ata që e dëmtojnë atë për interesa personale./L.F-dritare.net
