Një grua japoneze, e njohur si personi më i vjetër në botë nga Guinness World Records, ka vdekur në moshën 116-vjeçare.
Tomiko Itooka vdiq në një shtëpi pleqsh në qytetin e Ashiya, prefektura Hyogo, sipas zyrtarëve. Ajo u bë personi më i vjetër në botë pasi Maria Branyas Morera e Spanjës vdiq në gusht 2024 në moshën 117-vjeçare.
“Zonja Itooka na dha kurajo dhe shpresë gjatë jetës së saj të gjatë.”, tha në një deklaratë kryebashkiaku 27-vjeçar i Ashiya, Ryosuke Takashima.
Zonja Itooka lindi më maj 1908, gjashtë vjet para Luftës së Parë Botërore dhe të njëjtin vit kur makina Ford Model T u lançua në SHBA.
Ajo u verifikua si personi më i vjetër në botë në shtator 2024 dhe iu dha certifikata zyrtare GWR në Ditën e Respektit për të Moshuarit, e cila është një festë publike japoneze që festohet çdo vit për të nderuar qytetarët e moshuar të vendit.
Zonja Itooka, jetoi luftëra botërore dhe pandemi, si dhe përparime teknologjike.
Si studente, ajo luajti volejboll dhe u ngjit dy herë në malin Ontake 3,067 metra. Ajo shijonte bananet dhe Calpis, një pije freskuese qumështore e njohur në Japoni, sipas deklaratës së kryebashkiakut.
Ajo u martua në moshën 20-vjeçare dhe kishte dy vajza dhe dy djem, sipas Guinness. Gjatë Luftës së Dytë Botërore ajo menaxhoi zyrën e fabrikës së tekstilit të burrit të saj. Ajo jetoi e vetme në Nara pasi burri i saj vdiq në 1979-ën. Ajo ka lënë pas një djalë dhe një vajzë, si dhe pesë nipër e mbesa. Sipas zyrtarëve, u mbajt një shërbim funerali me familjen dhe miqtë.
Që nga shtatori, Japonia numëronte më shumë se 95,000 njerëz që ishin 100 vjeç e lart, 88% ishin gra. Nga 124 milionë banorët e vendit, gati një e treta janë 65 vjeç ose më të vjetër.
Murgesha braziliane Inah Canabarro Lucas, e cila lindi 16 ditë pas Itooka-s dhe është 116 vjeçe, tani besohet se ajo është njeriu më i vjetër në botë./K.C/dritare.net
