Kalendari/ Mëngjesin e së martës syfyri i parë, nis nesër Muaji i Ramazanit!
E Hënë 12 Prill 2021, 15:03
Dritare.net
Në mëngjesin e së martës do të konsumohet syfyri i parë, që shënon fillimin e muajit të Ramazanit. Edhe këtë vit besimtarët myslimanë do ta festojnë Muajin e Ramazanin duke ndjekur masat antikovid. Falja e vakteve do të bëhet individualisht secili në shtëpinë tij. Kreu i Komitetit Mysliman Bujar Spahiu ndau një mesazh për besimtarët myslimanë me rastin e nisjes së muajit të Ramazanit. Ky muaj, shprehet Spahiu, është muaj i faljes dhe mirëkuptimit ndaj apelon për vepra humane.
"Me emrin e Zotit, Mëshiruesit, Mëshirëbërësit!
Të dashur qytetarë, motra dhe vëllezër, nesër më 13 prill, është dita e parë e Muajit të Bekuar të Ramazanit. Me rastin e fillimit të muajit të Ramazanit, ju përcjell urimet më të sinqerta që ky Ramazan të jete muaj i mëshirës së ndërsjellë mes njeri-tjetrit, muaj i faljes dhe mirëkuptimit, muaj i ngritjes morale dhe shpirtërore, për përballimin me sukses të sfidave në të cilat ndodhemi dhe ato që na presin. Rrugëtimi ynë i përbashkët për të arritur kënaqësinë e Zotit kërkon motivim të lartë. Ju ftoj që të jemi më solidarë me familjet në nevojë, t’i shtrijmë dorën njëri-tjetrit në punë të mbara!
Të nderuar besimtarë!
Çdo adhurim gjatë këtij muaji, ka vlerë shumëfish më të madhe. Prandaj, njerëzit përmes sakrificave të shumanshme personale, veprave të bamirësisë, vizitave tek njëri-tjetri, lënien anash të mospajtimeve etj., synojnë të arrijnë kënaqësinë e Zotit dhe harmoninë me njerëzit me të cilët rrethohen. Duke u frymëzuar nga këto synime fisnike, uroj nga zemra që ky muaj të jetë muaj i faljes, mirëkuptimit, dashurisë, unitetit dhe paqes. Duke ju uruar muajin e Ramazanit, më lejoni t’ju dëshiroj një agjërim të lehtë, pranim të lutjeve tuaja, shëndet të mirë, lumturi e prosperitet për ju dhe familjet tuaja!"
Ky është kalendari i Muajit të Ramazanit./K.C/dritare.net
