Megaoperacioni/ Sekuestrohen restorante, biznese dhe një televizion. Emrat
E Mërkurë 21 Maj 2025, 12:12
Dritare.net
Prokurori Vladimir Mara ka bërë publike se gjatë megaoperacionit Shqipëri-Itali janë sekuestruar pasuri të konsiderueshme që dyshohet se janë përfituar nga veprimtaria kriminale, përfshirë tre restorante në Durrës, një bar-kafe, gjashtë shoqëri tregtare si dhe një televizion në qytetin e Vlorës.
"Është dokumentuar gjithë cikli nga vendet e origjinës dhe, falë analizës së drejtorisë së DIA-s, është arritur të konkludohet i gjithë ky aktivitet kriminal me një vlerë afro 5 milionë euro. Gjej momentin t’i falënderoj autoritetet italiane dhe ne, falë këtij bashkëpunimi, patëm këtë rezultat.
Kemi ekzekutuar 52 urdhër-arreste dhe janë hetuar 42 masa sigurie dhe janë evidentuar vepra korruptive në institucionet e Shqipërisë, për zyrtarë shtetërorë dhe për një avokat. Sot janë ekzekutuar vendimet e gjykatës. Janë sekuestruar tre restorante në Durrës, një bar-kafe, 6 shoqëri tregtare dhe një televizion në qytetin e Vlorës. Gjatë këtij hetimi më parë janë sekuestruar 3 milionë euro në cash, të cilat edhe këto i janë nënshtruar këtij hetimi penal"-tha Mara.
Emrat e përfshirë
Algerta Fejzulla është një ish-zyrtare shqiptare dhe avokate nga Vlora, e cila aktualisht është nën hetim për përfshirje në një rrjet ndërkombëtar të pastrimit të parave të përfituara nga trafiku i drogës.
Karriera dhe përfshirja në korrupsion
Në vitin 2013, Fejzulla u emërua drejtoreshë e Zyrës Përmbarimore të Vlorës. Në shkurt të vitit 2014, ajo u arrestua për korrupsion, pasi nëpërmjet një avokateje në Vlorë, Dhurata Sulaj (Tafili), i mori 50 mijë lekë të reja një qytetari, me qëllim që të shtynte në kohë ekzekutimin e një vendimi gjyqësor. Për këtë vepër, ajo u dënua me 1.6 vite burg.
Aktivitetet e dyshuara kriminale
Pas shlyerjes së dënimit, në vitin 2023, Fejzulla themeloi kompaninë “Dubai im” në Lungomare të Vlorës, e cila dyshohet se është përdorur për pastrimin e parave të përfituara nga aktivitetet kriminale.
Në shtator të vitit 2023, autoritetet spanjolle dhe Europol arrestuan 27 persona, përfshirë Fejzullën dhe bashkëshortin e saj, Nexhmedin Danaj, të cilët dyshohet se ishin pjesë e një grupi kriminal që kishte qarkulluar të paktën 65 milionë euro, produkt i trafikut të kokainës. Ky grup përdorte metodën “Hawala” për të transferuar dhe pastruar paratë e drogës.
Lidhjet me Dubai dhe pasuritë
Fejzulla dhe bashkëshorti i saj, Danaj, dyshohet se kanë përdorur kompani të regjistruara në Dubai për të qarkulluar miliona euro të përfituara nga aktivitetet kriminale. Në kuadër të operacionit të përbashkët antidrogë “URA” mes SPAK dhe autoriteteve italiane, më 21 maj 2025, janë sekuestruar disa pasuri që dyshohet se rrjedhin nga aktiviteti kriminal i trafikut të drogës, përfshirë kompaninë “Dubai im” dhe televizionin kabllor “Vlora Cable”.
Aktualisht, Algerta Fejzulla është nën hetim për pastrim parash dhe përfshirje në një rrjet kriminal ndërkombëtar. SPAK ka nisur procedurat për sekuestrimin e pasurive të saj, të cilat nuk justifikohen me burime të ligjshme./L.F-dritare.net
