Një zyrtar i lartë i Hamasit i ka konfirmuar BBC-së se grupi palestinez ka pranuar planin e presidentit amerikan Donald Trump për çarmatimin e plotë në Rripin e Gazës, ndërsa një deklaratë zyrtare pritet të publikohet në orët në vijim. Deri më tani, Izraeli nuk ka dhënë asnjë reagim zyrtar ndaj këtij zhvillimi.
Lajmi vjen pasi Donald Trump njoftoi se Bordi i Paqes ka arritur një marrëveshje për çarmatimin e plotë të Hamasit dhe grupeve të tjera të armatosura që veprojnë në Gaza. Sipas presidentit amerikan, marrëveshja përbën një hap të rëndësishëm drejt zbatimit të planit të tij për t'i dhënë fund konfliktit shumëvjeçar mes Izraelit dhe Hamasit.
Megjithatë, zbatimi i marrëveshjes mbetet i pasigurt. Sipas burimeve të përfshira në negociata, Hamasi kërkon që Izraeli të respektojë më parë angazhimet e marra në marrëveshjet e mëparshme, duke përfshirë ndalimin e operacioneve ushtarake, tërheqjen e forcave izraelite nga Gaza dhe rritjen e ndihmave humanitare. Vetëm pas përmbushjes së këtyre kushteve do të nisë procesi i dorëzimit dhe vendosjes nën kontroll të armëve. Nga ana tjetër, burime izraelite kanë bërë të ditur se nuk do të ketë tërheqje të trupave përpara se çarmatimi të verifikohet.
Sipas planit të propozuar nga SHBA, procesi do të zhvillohet në disa faza dhe do të monitorohet nga një mekanizëm ndërkombëtar. Ai parashikon transferimin e administrimit të Gazës te një komitet civil palestinez, mbikëqyrjen e çarmatimit nga një forcë ndërkombëtare stabilizuese, si edhe tërheqjen graduale të forcave izraelite në përputhje me përparimin e procesit.
Nëse marrëveshja zbatohet, ajo mund të shënojë një kthesë historike në konfliktin e Gazës, duke hapur rrugën për një administrim të ri të territorit dhe përpjekje më të gjera ndërkombëtare për rindërtimin dhe stabilizimin e rajonit. Megjithatë, me mungesën e një reagimi zyrtar nga Izraeli dhe mosbesimin e vazhdueshëm mes palëve, mbetet e paqartë nëse marrëveshja do të hyjë në fuqi sipas afateve të parashikuara./dritare.net
