VIDEO/ Çfarë la pas protesta studentore para Ministrisë së Arsimit!
Wednesday 14 October 2026, 12:12
Dritare.net
Xhama të thyer, mure të njollosura me bojë, pllaka trotuari të shkulura dhe mbeturina kudo.
Kjo është pamja që paraqet sot godina e Ministrisë së Arsimit në Rrugën e Durrësit në Tiranë, një ditë pas protestës së studentëve që u përshkallëzua në përplasje me policinë.
Fasada e verdhë e ministrisë është e mbushur me njolla boje të kuqe e të zezë, ndërsa disa dritare kanë xhamat të copëtuar. Edhe dyert e hyrjes kryesore mbajnë ende gjurmët e sendeve që u hodhën drejt godinës.
Trotuari përreth është ende i mbushur me pllaka të shkulura, copa betoni, shishe plastike e mbeturina të tjera. E dëmtuar është edhe porta e hekurt në krah të godinës. Që në orët e para të mëngjesit punëtorët kanë nisur rivendosjen e pllakave të trotuarit.
Kujtojmë se protesta e thirrur nisi të martën rreth orës 14:00. Qindra studentë e qytetarë u mblodhën para ministrisë duke kërkuar arsim cilësor, kushte më të mira në konvikte e universitete.
Situata u tensionua pas hedhjes së vezëve, bojës e kapsollave drejt godinës. Më pas disa protestues shkulën pllaka trotuari e kangjella dhe thyen xhamat e ministrisë. Policia ndërhyri me gaz lotsjellës dhe autobot uji për të shpërndarë turmën.E.P-dritare.net
