Braçe ngre alarmin: Ku shkon gjithë ai qumësht pluhur që vjen në doganë? Unë e kam listën!
E Mërkurë 23 Korrik 2025, 08:08
Dritare.net
Në një deklaratë të fortë gjatë emisionit “Dekalog” të gazetarit Roland Qafoku në Dritare TV, deputeti socialist Erion Braçe ngriti alarmin për sigurinë ushqimore dhe mungesën e kontrollit nga institucionet përgjegjëse ndaj industrisë së përpunimit të qumështit në Shqipëri.
Braçe vuri në pikëpyetje transparencën e proceseve në fabrikat e mëdha të përpunimit të qumështit, duke ngritur disa çështje serioze:
“A është kërkuar ndonjëherë autofaturë në këto fabrika? A është bërë ndonjëherë verifikimi i sasisë së qumështit që hyn dhe produktit që del prej andej?”, pyeti ai me ton kritik.
Ai ngriti gjithashtu shqetësimin për mungesën e gjurmueshmërisë nga autoritetet tatimore dhe AKU për produktet e importuara si qumështi pluhur dhe vaji i palmës:
“Ku shkon vaji i palmës dhe qumështi pluhur që hyn në doganë? A i ka gjurmuar ndonjëherë tatimet, përveç kur isha unë zëvendëskryeministër dhe i detyrova ta bënin?”
Braçe paralajmëroi se nëse nuk merren masa, do të publikojë një listë me etiketat e miratuara nga AKU që tregojnë përdorimin e qumështit pluhur dhe vajit të palmës në produkte të përpunuara.
“Sepse nuk janë baxhot, ata që mbledhin qumësht nga fermerët e fshatrave, që cenojnë sigurinë ushqimore. E dini kush janë? Janë fabrikat e mëdha!
Unë kam një listë të etiketave të miratuara nga AKU për përdorimin e qumështit pluhur dhe vajit të palmës? Dhe po vazhdoi kjo histori do publikoj listën”, u shpreh ai me tone të ashpra.
Deklaratat e Braçes vijnë në një moment kur shqetësimet për cilësinë e ushqimeve dhe mungesën e kontrollit të produkteve të importuara janë në rritje. Kjo ndërhyrje mund të risjellë në vëmendje nevojën për hetime serioze dhe transparencë më të madhe në sektorin e përpunimit ushqimor në vend./L.F-dritare.net
