Mund të mos rikthehem për një kohë të gjatë! Ariana Grande surprizon fansat
Sunday 16 August 2026, 12:12
Dritare.net
Ariana Grande është rikthyer në skenat britanike pas gjashtë vitesh, duke nisur në Londër pjesën e turneut të saj “Eternal Sunshine”. Mijëra fansa mbushën arenën “O2”, duke e pritur këngëtaren mes duartrokitjeve, këngëve dhe koreografive të improvizuara.
Koncerti dyorësh tregoi edhe një herë fuqinë vokale të Grandes, e cila interpretoi live këngë të njohura si “Into You”, “Break Free”, “7 Rings” dhe “Dangerous Woman”. BBC vlerëson se zëri i saj me një shtrirje prej katër oktavash ishte në qendër të spektaklit, ndërsa skenografia dhe koreografitë shërbyen si plotësuese.
Turneu është i lidhur ngushtë me albumin “Eternal Sunshine” dhe me historinë personale të artistes, e cila përmes këngëve trajton dhimbjen, humbjen dhe mënyrën se si njeriu mëson të jetojë me kujtimet e vështira.
Gjatë koncertit, Grande u shfaq e emocionuar teksa interpretoi baladën “Hampstead”, ndërsa një tjetër moment që tërhoqi vëmendjen ishte ndryshimi i tekstit të “Thank U, Next”, ku ajo hoqi referencën e drejtpërdrejtë ndaj ish-partnerit Ricky Alvarez.
Këngëtarja pritet të zhvillojë edhe 10 koncerte në Londër, përpara përfundimit të turneut në shtator. Ajo u ka thënë fansave se pas këtyre shfaqjeve mund të largohet nga skena për një periudhë shumë të gjatë.
Vendimi vjen pas një periudhe të vështirë për artisten, e cila është përballur me vëmendje intensive mediatike dhe komente të shumta mbi jetën e saj personale dhe pamjen fizike. Grande ka deklaruar se tërheqja nga skena është një vendim i menduar gjatë dhe i marrë nga një pozicion i fuqizuar.
Fansat në Londër e pritën vendimin me mbështetje, ndërsa shumë prej tyre e cilësuan koncertin si një nga performancat më të mira të Grandes dhe shprehën shpresën që këngëtarja të rikthehet në skenë pas pushimit./K.C/dritare.net
