Si ndodhi aksidenti tragjik i trenave në Spanjë që la të paktën 39 të vdekur
E Hënë 19 Janar 2026, 19:07
Dritare.net
Të paktën 39 persona kanë humbur jetën dhe dhjetëra të tjerë janë plagosur pas përplasjes së dy trenave në jug të Spanjës, pranë qytetit të Kordobës, njoftoi Garda Civile spanjolle. Autoritetet lokale e kanë cilësuar ngjarjen si aksidenti më i rëndë hekurudhor në vend në më shumë se një dekadë.
Aksidenti ndodhi të dielën rreth orës 19:45 me orën lokale, rreth një orë pasi një tren ishte nisur nga Malaga drejt Madridit. Sipas operatorit të infrastrukturës hekurudhore Adif, treni doli nga shinat dhe kaloi në binarin e kundërt, ku u përplas me një tren tjetër që udhëtonte nga Madridi jugor drejt Huelvës. Treni i dytë u përplas me një argjinaturë pranë shinave, ndërsa shumica e viktimave dhe të plagosurve ndodheshin në vagonët e përparmë të tij.
Shkaqet e aksidentit mbeten ende të paqarta. Një hetim është hapur, por autoritetet thonë se përfundimet nuk priten për të paktën një muaj. Ministri i Transportit, Óscar Puente, e ka cilësuar aksidentin si “jashtëzakonisht të çuditshëm”, ndërsa drejtuesit e hekurudhave kanë përjashtuar shpejtësinë e tepërt apo gabimin njerëzor, duke sugjeruar se shkaku mund të jetë një defekt mekanik ose problem infrastrukture.
Kryeministri Pedro Sánchez vizitoi vendngjarjen të hënën dhe shpalli tre ditë zie kombëtare, duke premtuar zbardhjen e plotë të shkaqeve të tragjedisë dhe duke falënderuar ekipet e emergjencës për përpjekjet e tyre.
Në dy trenat udhëtonin rreth 400 pasagjerë dhe anëtarë stafi. Ekipet e shpëtimit vijojnë punën mes vështirësish të mëdha, pasi disa vagonë janë dëmtuar rëndë. Deri të hënën pasdite, 122 persona kishin marrë ndihmë mjekësore, ndërsa 48 mbeteshin të shtruar në spital, përfshirë pesë të mitur. Numri i viktimave mund të rritet, ndërsa identifikimi i të ndjerëve është ende në proces.
