Veliaj reagon pas transferimit në Fier: Rrëmbim policor, më cenohen të drejtat
Wednesday 28 October 2026, 16:04
Dritare.net
Kryebashkiaku i Tiranës, Erion Veliaj ka reaguar pas transferimit të tij nga paraburgimi i Durrësit në IEVP Fier.
Kryebashkiaku i Tiranës, Erion Veliaj, ka reaguar përmes një postimi në Instagram pas transferimit nga paraburgimi i Durrësit në burgun e Fierit, duke kundërshtuar mënyrën se si është kryer ky veprim. Veliaj pretendon se as ai dhe as avokati i tij nuk janë njoftuar për arsyet e transferimit, të cilin e cilëson si “rrëmbim policor” dhe shkelje të të drejtave të tij ligjore.
Statusi i plotë i Veliajt:
"Sot, një grup punonjësish të Policisë së Burgjeve, të dërguar nga Drejtoria e Përgjithshme e Burgjeve, janë paraqitur në IEVP Durrës për të më transferuar në burgun e Fierit.
Pavarësisht kërkesave të përsëritura, si nga unë ashtu edhe nga avokati im, për t’u njohur me aktin që urdhëron transferimin dhe arsyet që e justifikojnë atë, na është refuzuar vënia në dispozicion e këtij dokumenti.
Një transferim i detyruar, pa më bërë të njohur aktin dhe arsyet ligjore mbi të cilat mbështetet, për mua përbën një rrëmbim policor dhe cenon rëndë të drejtat e mia.
Unë nuk kam dhënë pëlqimin për këtë transferim dhe kam kundërshtuar mënyrën se si po realizohet, pa transparencë dhe pa më mundësuar ushtrimin efektiv të të drejtave të mia ligjore.
I kërkoj publikisht Ministrit të Drejtësisë, Avokatit të Popullit dhe Komitetit Shqiptar të Helsinkit të ndërhyjnë urgjentisht, të verifikojnë arsyet dhe shkaqet e këtij transferimi politik."/K.C/dritare.net
