Na ndiqni edhe në

Bota

Trump, Putin dhe Xi Jinping firmosin deklaratën për paqen! Çfarë vendosën për armët bërthamore

Trump, Putin dhe Xi Jinping firmosin deklaratën për paqen!

Presidenti amerikan Donald Trump, presidenti rus Vladimir Putin dhe presidenti kinez Xi Jinping kanë publikuar një deklaratë të përbashkët për paqen, pas një takimi historik trepalësh të zhvilluar këtë të enjte, më 19 nëntor, në qytetin Shenzhen të Kinës.

Takimi, i pari i këtij formati mes tre liderëve, u zhvillua në kuadër të samitit të Bashkëpunimit Ekonomik Azi-Paqësor (APEC) dhe zgjati rreth 80 minuta.

Në deklaratën e përbashkët, tre presidentët shprehën angazhimin për ruajtjen e stabilitetit strategjik dhe sigurisë ndërkombëtare, duke theksuar se një luftë bërthamore nuk mund të ketë fitues dhe nuk duhet të ndodhë kurrë.

Sipas dokumentit, Shtetet e Bashkuara, Rusia dhe Kina kanë rënë dakord të zhvillojnë dialog për uljen e rreziqeve bërthamore dhe parandalimin e përhapjes së armëve të shkatërrimit në masë.

Deklarata përfshin gjithashtu angazhimin për reformimin e Organizatës së Kombeve të Bashkuara, me synimin që ajo t’u përgjigjet më mirë sfidave globale, si dhe bashkëpunimin për garantimin e furnizimit të qëndrueshëm me energji.

Një tjetër pikë e dokumentit lidhet me Gjykatën Penale Ndërkombëtare. Tre liderët theksuan rëndësinë e respektimit të imunitetit të zyrtarëve shtetërorë dhe kërkuan që institucionet ndërkombëtare të drejtësisë të mos abuzojnë me juridiksionin e tyre.

“Po shkruajmë historinë”, deklaroi Trump në nisje të takimit, ndërsa Putin e cilësoi këtë moment si një faqe të re në historinë e diplomacisë. Nga ana e tij, Xi Jinping theksoi se tre vendet kanë përgjegjësi të përbashkët për ruajtjen e paqes botërore.

Megjithatë, pavarësisht deklaratës për paqen, takimi nuk solli marrëveshje konkrete për përfundimin e luftës në Ukrainë apo konfliktit me Iranin. Këto dy çështje, që kanë shkaktuar tensione të mëdha ndërkombëtare, nuk u përmendën në dokumentin përfundimtar.

Gjithashtu, nuk u përcaktua asnjë afat për nisjen e negociatave të përbashkëta për kontrollin e armëve bërthamore.

Takimi ka tërhequr vëmendjen ndërkombëtare edhe për shkak të mungesës së liderëve europianë në diskutimet mes tre fuqive të mëdha./dritare.net