Trump pas takimit me Putinin dhe Xi Jinpingun: Marrëveshja bërthamore do të jetë...
Dritare.net

Presidenti amerikan Donald Trump ka folur për negociatat me Iranin, luftën në Ukrainë dhe rrezikun e armëve bërthamore, pas takimit historik me presidentin rus Vladimir Putin dhe atë kinez Xi Jinping në Shenzhen të Kinës, më 19 nëntor.
Në një intervistë për Fox News, Trump deklaroi se Irani dëshiron të arrijë një marrëveshje me Shtetet e Bashkuara, por theksoi se Uashingtoni kërkon një zgjidhje të qëndrueshme dhe afatgjatë.
Presidenti amerikan u shpreh se SHBA-ja nuk ka nevojë për ndihmën e Rusisë apo Kinës për t'i dhënë fund konfliktit me Iranin. Ai pretendoi se forcat amerikane kanë dëmtuar rëndë kapacitetet ushtarake iraniane, përfshirë flotën detare, aviacionin dhe sistemet e mbrojtjes ajrore.
Duke iu referuar negociatave me Teheranin, Trump tha se pala iraniane kërkon marrëveshje, por se ajo duhet të garantojë një zgjidhje të qëndrueshme.
Një tjetër çështje e diskutuar ishte lufta mes Rusisë dhe Ukrainës. Trump deklaroi se kishte zhvilluar bisedime shumë të mira me Vladimir Putinin dhe se ekziston mundësia e arritjes së një marrëveshjeje për përfundimin e konfliktit.
Megjithatë, ai pranoi se negociatat mbeten të vështira, duke theksuar armiqësinë e thellë mes presidentit rus dhe atij ukrainas, Volodymyr Zelensky.
Trump tha se Putini kishte shprehur dëshirën për t'i dhënë fund luftës përmes diplomacisë, ndërsa shmangu dhënien e hollësive për garancitë e mundshme të sigurisë për Ukrainën përpara arritjes së një marrëveshjeje.
Presidenti amerikan u ndal edhe te arsenalet bërthamore të fuqive të mëdha. Pas bisedimeve me Putinin dhe Xi Jinpingun, ai pranoi se arritja e një marrëveshjeje për kufizimin e armëve bërthamore do të jetë jashtëzakonisht e vështirë.
Trump solli si shembull vështirësinë që do të kishte një shtet me mijëra armë bërthamore për të pranuar përgjysmimin e arsenalit të tij.
Megjithatë, ai theksoi se do të vazhdojë përpjekjet për një marrëveshje të tillë, me qëllim uljen e rrezikut të një konflikti bërthamor.
Takimi trepalësh mes Trumpit, Putinit dhe Xi Jinpingut përfundoi me miratimin e një deklarate të përbashkët për paqen, ku tre udhëheqësit riafirmuan se një luftë bërthamore nuk mund të fitohet dhe nuk duhet të zhvillohet.
Megjithatë, deklarata nuk përfshiu ndonjë marrëveshje konkrete për përfundimin e luftës në Ukrainë apo konfliktit me Iranin dhe nuk përcaktoi objektiva të detyrueshëm për reduktimin e armëve bërthamore./dritare.net