Na ndiqni edhe në

Arkiv

Punësimi në Gjermani/ Ambasadori: Më 1 mars hyri në fuqi ligji i ri, ja çfarë duhet të dini!

Punësimi në Gjermani/ Ambasadori: Më 1 mars hyri në fuqi

Ambasadori gjerman në vendin tonë, Peter Zingraf përmes një videomesazhi në Facebook ka thënë se nga 1 marsi i vitit 2020 në Gjermani hyri në fuqi “Ligji për imigrimin e fuqisë punëtore të kualifikuar”. Sipas Zingraf ky ligj zgjeron mundësitë për një emigrim drejt Gjermanisë, nga e gjithë bota.

Ambasadori thotë: “Për të përfituar nga Ligji i ri për Fuqinë Punëtore është e rëndësishme: Fillimisht bëni njohjen e kualifikimeve dhe më pas aplikoni për vizë.

Diplomat e huaja universitare dhe kualifikimet profesionale si rregull duhet të njihen fillimisht nga institucionet gjermane. Si mund ta bëni këtë, kujt duhet t’i drejtoheni, këtë e gjeni në faqen e internetit të Ambasadës Gjermane.

Në Shqipëri po shohim vitet e fundit një kërkesë të madhe për viza punësimi në Gjermani. Rregullat e njohur, veçanërisht aksesi i lehtësuar në tregun e punës gjerman për punonjësit e pak ose aspak të kualifikuar, mbetet ende në fuqi. Ne në ambasadë do bëjmë më të mirën tonë për t’u shërbyer sa më shpejt të jetë e mundur personave që kanë bërë tashmë një aplikim.

Por ne kemi për momentin një kohë pritjeje më të gjatë se një vit për aplikuesit shqiptarë pa kualifikim profesional ose diplomë universitare.

Më lejoni të theksoj në këtë kontekst se qëllimi ynë që prej 30 vitesh është të përmirësojmë shanset dhe mundësitë këtu në Shqipëri. Për këtë kemi financuar që prej vitit 1988 projekte të bashkëpunimit për zhvillim në vlerën e mbi një miliard eurove.

Këtu e kam fjalën kryesisht për projekte të infrastrukturës, si fuqizimi me ujë të pijshëm, por veçanërisht edhe për zhvillimin e turizmit, zhvillimin rural, mbështetjen e Startup-eve dhe arsimin dual profesional. Prandaj informohuni edhe për perspektivat në Shqipëri, për shembull te Qendra Gjermane e Informacionit për Migracionin, Arsim Profesional dhe Karrierë (DIMAK) në Tiranë dhe Shkodër”, shprehet ambasadori gjerman.”/K.C/dritare.net