Kreta goditet nga tërmeti i fortë me magnitudë 6.1 ballë!
E Enjte 22 Maj 2025, 08:08
Dritare.net
Një tërmet i fortë me magnitudë 6.1 ballë të shkallës Rihter goditi mëngjesin e sotëm zonën pranë Neapolis, në prefekturën e Lasithit, duke shkaktuar shqetësim të madh në mesin e banorëve të Kretës dhe përtej saj. Lëkundjet u ndjenë edhe në rajonin e Atikës, përfshirë Athinën.
Pas lëkundjeve banorë janë zgjuar të alarmuar, duke dalë jashtë banesave të tyre për siguri. Dëshmitarët raportuan një gjëmim të fuqishëm pas lëkundjeve, ndërsa pamjet filmike tregojnë kabllot elektrike dhe makinat duke u dridhur gjatë tërmetit, shkruan Prothotema.gr.
Në disa supermarkete, produkte ranë nga raftet, duke shkaktuar dëme materiale. Pasgoditjet nuk kanë munguar - janë regjistruar nëntë lëkundje të tjera, me magnitudë që varion nga 2.5 deri në 3.5 ballë të shkallës Rihter.
Shërbimet zjarrfikëse janë në patrullim aktiv për të kontrolluar gjendjen në terren, ndërsa rrëshqitje të vogla dheu janë vërejtur në rrugët provinciale. Në rrugën “25 Gushti” në Heraklion, një pjesë e një ndërtese u shemb pjesërisht, por fatmirësisht pa pasoja në njerëz.
Bashkitë e Heraklionit dhe Lasithit kanë urdhëruar inspektime në institucionet arsimore, megjithatë nuk është raportuar ndonjë problem serioz. Në një deklaratë zyrtare, Bashkia e Heraklionit njoftoi se të gjitha strukturat e saj janë në gjendje gatishmërie, ndërsa kanë bërë thirrje që qytetarët të ndjekin udhëzimet zyrtare dhe të shmangin zonat me rrezik./E.P-dritare.net
