Parashqevi Simaku dhe Agim Krajka, pamjet e rralla nga viti 1989!
E Shtunë 16 Maj 2026, 19:07
Dritare.net
Arkiva e mjeshtrit të fotografisë Stefan Gajo sjell sot në Dritare TV një tjetër moment të rrallë artistik. Pamje të patransmetuara më parë të ikonave të muzikës shqiptare si Agim Krajka, Parashqevi Simaku dhe shumë artistëve të njohur vijnë përmes një filmimi të rrallë.
Filmimi, i cili i përket fundit të vitit 1989, sjell momente unike nga udhëtimi i artistëve shqiptarë drejt Danimarkës, në një periudhë të trazuar politike për Shqipërinë dhe gjithë Ballkanin.
Në pamje shfaqen artistët gjatë udhëtimit, takimeve me diasporën shqiptare dhe momente spontane që nuk janë transmetuar kurrë më parë. Atmosfera e kohës, emocionet e artistëve dhe pritja e jashtëzakonshme e shqiptarëve në Danimarkë pasqyrojnë një periudhë kur arti ishte një nga urat e vetme që lidhte shqiptarët brenda dhe jashtë kufijve.
Filmimi sjell gjithashtu detaje të rralla nga prapaskenat e koncertit, lëvizjet e artistëve në Europë dhe emocionet e tyre teksa përballeshin për herë të parë me realitetin perëndimor, në një kohë kur Shqipëria vijonte të jetonte nën izolim të fortë komunist.
Ky material i rrallë historik rikthen jo vetëm kujtime të çmuara të artit shqiptar, por edhe frymën e një brezi artistësh që, përmes muzikës dhe kulturës, mbajtën gjallë lidhjen me shqiptarët e Kosovës dhe diasporën në një nga periudhat më të vështira të historisë moderne shqiptare./dritare.net
