Rama dhe Mickoski përurojnë pikën e përbashkët kufitare në Qafë Thanë
Dritare.net
Kryeministri Edi Rama dhe homologu i tij i Maqedonisë së Veriut, Hristijan Mickoski, morën pjesë në Qafë Thanë në inaugurimin e sistemit të integruar të kontrollit kufitar me një ndalesë, “One Stop Shop”. Ky sistem synon të lehtësojë lëvizjen e qytetarëve dhe mallrave mes dy vendeve, duke reduktuar procedurat dhe kohën e pritjes në kufi.
Gjatë fjalës së tij, Rama e cilësoi këtë zhvillim si një transformim që do t’u shërbejë miliona qytetarëve që kalojnë në këtë pikë kufitare, ndërsa theksoi se sistemi do të shtrihet edhe në pikat e tjera.
"Hedhim një hap konkret me këtë transformim për miliona njerëz që kalojnë këtë kufi.
Ne kemi një shprehje në shqip: beso dhe kontrollo. Deri tani në këtë doganë ishim kontrollo, kontrollo, tani jemi beso, kontrollo.
Hapi tjetër beso, beso, që të mos kemi më asnjë kontroll këtu, në rrugëtimin e përbashkët në BE.
Dua ta përforcoj kryeministrin maqedonas që jemi në një proces bashkëpunimi, ku kemi shumë gjëra që duhet t’i bëjmë së bashku. Pa diskutim, njëra ndër to është të çojmë para Korridorin 8.
Në mbyllje, dua t’i bashkohem kryeministrit Mickoski për ata që punuan për këtë ditë dhe për të realizuar më në fund këtë transformim që, siç thashë, do t’u vlejë shumë njerëzve, miliona njerëzve që kalojnë në këtë doganë. Do të vazhdojmë me pikat e tjera për të njëjtin sistem.
Kam edhe një ankesë për Hristjanin. Përkthyesen më të mirë e mbajti për vete”, tha Rama./L.F-dritare.net