Zelensky mbron sulmet ndaj Urës së Krimesë: Përgjigje e drejtë ndaj Rusisë! Putini kërkon të përshkallëzojë luftën
Dritare.net

Presidenti ukrainas Volodymyr Zelensky ka mbrojtur sulmet e ushtrisë ukrainase ndaj Urës së Krimesë, e cila lidh Rusinë me gadishullin e aneksuar në vitin 2014. Në një intervistë për BBC në Kiev, ai i cilësoi sulmet si një përgjigje të drejtë ndaj bombardimeve të vazhdueshme ruse mbi infrastrukturën ukrainase.
Zelensky deklaroi se Rusia ka kryer 109 sulme të veçanta ndaj urave në Ukrainë, ndërsa hodhi poshtë pretendimet e presidentit rus Vladimir Putin se Ura e Krimesë përdoret vetëm për qëllime civile.
Sipas presidentit ukrainas, ura shërben edhe për transportimin e tankeve, pajisjeve ushtarake dhe furnizimeve të ushtrisë ruse drejt Krimesë.
“Nëse Putini do të përdorte internetin, mund ta shihte edhe vetë”, u shpreh Zelensky, duke iu referuar pamjeve të mjeteve ushtarake ruse që kalojnë mbi urë.
Sulmet e fundit ukrainase me raketa dhe dronë kanë shkatërruar pjesën qendrore të urës rrugore, duke bërë që një segment i saj dhe një prej harqeve mbështetëse të shemben në det. Si pasojë, ura është bërë e papërdorshme për qarkullimin rrugor.
Presidenti ukrainas hodhi poshtë edhe pretendimin se sulmet ndaj urës kanë nxitur bombardimet e fundit ruse.
Sipas tij, përshkallëzimi i sulmeve tregon se Putini nuk dëshiron t'i japë fund luftës, por po kërkon arsye për ta vazhduar atë.
Ndërkohë, Rusia ka vijuar sulmet me raketa dhe dronë ndaj qyteteve ukrainase. Në Kryvyi Rih, qytetin e lindjes së Zelenskyt, një djalë shtatëvjeçar dhe një punonjëse shëndetësore 20-vjeçare humbën jetën, ndërsa 58 persona të tjerë u plagosën.
Autoritetet ukrainase raportuan gjithashtu 11 të plagosur në rajonin e Kharkivit dhe një tjetër në Rivne.
Deklaratat e Zelenskyt u bënë përpara takimit në Kiev me sekretarin britanik të Mbrojtjes, Wes Streeting, i cili riafirmoi mbështetjen e Europës për Ukrainën.
“Sa më shumë që Putini përpiqet të na përçajë, aq më të vendosur bëhemi”, deklaroi Streeting.
Ai dënoi gjithashtu goditjen e territorit polak nga raketat ruse gjatë stërvitjeve ushtarake të Koalicionit të Vullnetit, duke e cilësuar ngjarjen një provokim të rëndë.
Vizita e zyrtarit britanik vjen pas takimit të liderëve europianë në Berlin me përfaqësuesit amerikanë, ku u diskutuan mundësitë për nisjen e negociatave me Moskën për përfundimin e luftës.
Zelensky u shpreh skeptik për mundësinë që Rusia të pranojë kompromise, duke theksuar se kishte parashikuar që Putini do të gjente një arsye për përshkallëzimin e konfliktit.
Nga ana tjetër, Streeting deklaroi se presidenti rus nuk mund të paraqitet si viktimë, pasi Rusia është agresorja në këtë luftë.
“Putini nuk ka asnjë të drejtë të luajë rolin e viktimës. Ai është agresori në këtë luftë”, tha zyrtari britanik.
Ndërkohë, tensionet janë zgjeruar edhe në Detin Baltik. Finlanda njoftoi se një anije tregtare ruse është dëmtuar nga një sulm me dron në ujërat ndërkombëtare të Gjirit të Finlandës. Autoritetet finlandeze vendosën kufizime të përkohshme për lundrimin dhe aviacionin në zonë, për arsye sigurie./dritare.net