Kam burime nga CIA! Ish-luftëtari i UÇK-së: Ja çfarë do të vendosë Haga!
Wednesday 16 September 2026, 08:08
Dritare.net
Kreu i Organizatës së Veteranëve të Luftës së UÇK-së në Shtetet e Bashkuara të Amerikës, Astrit Huskaj, ka folur për procesin në Hagë ndaj ish-krerëve të Ushtrisë Çlirimtare të Kosovës, gjatë një interviste në emisionin “Dekalog” të gazetarit Roland Qafoku në DritareTV.
Huskaj u ndal te vendimi i pritshëm për Hashim Thaçin, Kadri Veselin, Jakup Krasniqin dhe Rexhep Selimin, duke deklaruar se, sipas informacioneve që ai disponon, njëri prej tre gjyqtarëve do të votojë për pafajësi. Sipas tij, për një vendim në favor të ish-krerëve të UÇK-së do të nevojiteshin të paktën dy vota nga trupi prej tre gjyqtarësh.
“Unë kam informacione që do të dënohen”, deklaroi Huskaj, duke iu referuar Hashim Thaçit, Kadri Veselit, Jakup Krasniqit dhe Rexhep Selimit. Ai tha se informacionet vijnë nga bisedat dhe kontaktet që kanë pasur me amerikanët, ndonëse theksoi se në komunikimin diplomatik nuk jepen përgjigje të drejtpërdrejta.
Gjatë intervistës, kreu i veteranëve të UÇK-së në SHBA kritikoi edhe qëndrimin e administratës amerikane, duke pretenduar se nuk është angazhuar sa duhet për këtë çështje. Ai argumentoi se gjatë luftës së Kosovës strukturat amerikane dhe perëndimore kishin bashkëpunuar ngushtë me UÇK-në dhe se, sipas tij, kjo duhet të merret parasysh në vlerësimin e akuzave ndaj ish-drejtuesve të saj.
Një tjetër pjesë e fortë e intervistës lidhej me pasojat që, sipas Huskajt, mund të sillte një vendim fajësie. Ai paralajmëroi se një verdikt dënues mund të përdorej politikisht dhe juridikisht nga Serbia kundër shtetësisë së Kosovës.
“Dënimi, verdikti dënues... është fillimi i shkatërrimit të shtetit, të zhbërjes së shtetit të Kosovës, shtetësisë së Kosovës”, deklaroi ai në “Dekalog”.
Huskaj foli gjithashtu për mundësinë e reagimeve qytetare në rast të një vendimi negativ. Megjithatë, ai u bëri thirrje qytetarëve të Kosovës të ruajnë qetësinë dhe gjakftohtësinë, duke u shprehur kundër revoltave. Ai tha se shpreson që parashikimet e tij të rezultojnë të gabuara dhe që katër ish-drejtuesit e UÇK-së të lirohen.
Gjatë bisedës u diskutua edhe roli i ish-kryeprokurorit të Zyrës së Prokurorit të Specializuar, Jack Smith, si dhe qëndrimi i SHBA-së ndaj procesit. Huskaj ngriti kritika të forta ndaj mënyrës se si është zhvilluar çështja, duke e cilësuar Gjykatën Speciale si një proces të politizuar.
