Na ndiqni edhe në

Ngjarjet e Ditës

Ministri i Kulturës i përgjigjet Fevziut: Teatri i Kukullave nuk do të bëhet qendër kulturore hebraike!

Ministri i Kulturës i përgjigjet Fevziut: Teatri i Kukullave nuk do

Ministri i Kulturës, Blendi Gonxhja, ka përgënjeshtruar publikisht pretendimet se godina historike e Teatrit të Kukullave në Tiranë do të ndryshojë destinacion dhe do të shndërrohet në një qendër kulturore hebraike. Përmes një reagimi në rrjetet sociale, Gonxhja i është përgjigjur gazetarit Blendi Fevziu, nga deklaratat e të cilit morën shkas aludimet, duke theksuar se Teatri i Kukullave do të vijojë të funksionojë si më parë.


E PAVËRTETË! ❌ Teatri i Kukullave nuk do të shndërrohet në asnjë funksion tjetër, nuk do të ndryshojë destinacion dhe as nuk do të bëhet një qendër kulturore hebraike!

Pretendimet që po qarkullojnë në media dhe rrjete sociale, marrë shkas nga një dalje dhe aludim i gazetarit Blendi Fevziu, për ndryshimin e funksionit të godinës historike të Teatrit të Kukullave, nuk qëndrojnë! Keqardhje që më duhet të përgënjeshtroj një mik e një gazetar që kishte çdo mundësi e akses të pyeste përpara se të nxitonte të lëshonte një hipotezë të tillë që nuk ja kishte borxh as Teatri i Kukullave, as ekipi i shkëlqyer që e animon e as publiku i vogëlushave dhe prindërve që atë institucion e duan si drita e syve. Jo se qendrat e kulturave të tjera janë herezi, aspak, por se është e gabuar të përdoret një realitet kaq simbolik duke e përshkruar si të zëvendësueshëm nga diçka që për shkak të aktualitetit do krijonte një ngarkesë të re që të ushqente fantazi e paranoja absurde.

E vërteta është se Teatri i Kukullave vijon të jetë një nga qendrat më të dashura kulturore për fëmijët dhe familjet në Tiranë. Një hapësirë ku arti, imagjinata dhe edukimi bashkohen çdo ditë përmes shfaqjeve dhe aktiviteteve të shumta, për të cilat mbahet radhë.

Vetëm në shtatë muajt e parë të vitit 2026, Teatri i Kukullave ka realizuar 158 shfaqje, atmosferë magjike e argëtim, ndjekur nga 16,725 spektatorë. Krenari e mirënjohje për menaxhimin profesional e të pakursyer.

Godina historike, pjesë e rëndësishme e trashëgimisë kulturore të kryeqytetit, është restauruar dhe rijetëzuar përmes programit EU4Culture, të financuar nga Bashkimi Europian dhe të zbatuar nga UNOPS, duke u rikthyer në funksion të plotë për publikun sipas projektit tonë.

Sot, përveç skenës teatrore, kjo godinë mirëpret edhe Ekspozitën Muzeale të Kukullave dhe Ekspozitën Muzeale të ish-Parlamentit, duke ndërthurur krijimtarinë artistike me historinë, nostalgjinë dhe kujtesën tonë kombëtare.

Teatri i Kukullave ka një identitet të qartë, një program të vazhdueshëm dhe mijëra spektatorë që i japin jetë!

Respekti për ndjeshmëritë e njerëzve duhet të prijë çdo publikim apo debat, duke evituar dezinformimin.", thuhet në reagimin e ministrit./K.C/dritare.net