A është normale të flasësh me veten? Psikologia Enertila Bekteshi shpjegon
Monday 28 September 2026, 13:01
Dritare.net
Një lexuese 45-vjeçare i është drejtuar Dritare.net për të ndarë një shqetësim që e shoqëron prej kohësh. Ajo tregon se ndonjëherë e kap veten duke folur me zë të lartë me veten dhe kërkon të kuptojë nëse kjo sjellje është normale.
Psikologe Enertila Bekteshi përgjigjet:
Gjatë periudhave të caktuara, mund ta gjeni veten duke folur më shumë me veten. Kjo nuk do të thotë domosdoshmërisht se ka diçka që nuk shkon. Në shumë raste, është thjesht një mënyrë për të menaxhuar mendimet, emocionet apo situatat sfiduese.
Po, është normale të flasësh me veten.
Kjo është një sjellje e zakonshme dhe mund të shfaqet në situata të ndryshme: përpara një vendimi të rëndësishëm, gjatë momenteve stresuese apo edhe gjatë kryerjes së aktiviteteve të përditshme.
Në shumicën e rasteve, të folurit me veten me zë të lartë mund të ndihmojë në organizimin e mendimeve, përqendrimin dhe drejtimin e veprimeve. Gjithashtu mund të ndihmojë në zgjidhjen e problemeve, nxitjen e kreativitetit dhe çlirimin e tensionit emocional.
Stresi mund të ndikojë gjithashtu në këtë sjellje. Kur flasim me veten, aktivizohen zona të trurit që lidhen me prodhimin dhe përpunimin e gjuhës, në mënyrë të ngjashme me rastet kur komunikojmë me një person tjetër.
Të folurit me zë të lartë mund të ketë edhe përfitime praktike. Për shembull, kur kërkojmë një objekt dhe e emërtojmë me zë, fjala mund të na ndihmojë të përqendrojmë më mirë vëmendjen.
Megjithatë, ka raste kur të folurit me veten mund të jetë një shenjë që kërkon vlerësim profesional. Për shembull, nëse një person i drejtohet dikujt sikur të ishte realisht i pranishëm në dhomë, beson se ai person po e dëgjon ose po i përgjigjet, dëgjon zëra që nuk vijnë nga një burim i jashtëm, humbet kontaktin me realitetin ose izolohet socialisht, këto mund të jenë arsye për të kërkuar ndihmë profesionale.
Në disa raste, përvoja të tilla mund të shfaqen në kontekstin e çrregullimeve psikotike ose disociative, ndërsa në raste të tjera mund të shoqërojnë vështirësi më të zakonshme si ankthi apo depresioni.
E dashur lexuese, nëse të folurit me veten është bërë e vështirë për t'u menaxhuar, ju shkakton shqetësim të madh ose ka filluar të ndërhyjë në jetën tuaj të përditshme, mund të jetë koha për të kërkuar mbështetje profesionale.
Nëse kjo sjellje është bërë e pakontrollueshme, ju shkakton shqetësim të konsiderueshëm ose po ju shtyn drejt izolimit nga të tjerët, biseda me një profesionist të shëndetit mendor mund t'ju ndihmojë të kuptoni më mirë se çfarë po ndodh dhe të gjeni mënyra më të dobishme për ta përballuar.
Shpresoj që ky këndvështrim t'ju ndihmojë sadopak për ta kuptuar më mirë situatën tuaj.
Gjithë të mirat!
/Dritare.net
