SHBA dhe Irani në tryezën e bisedimeve pas kërcënimit të Trump: Marrëveshje, ose asgjësim
Wednesday 23 September 2026, 08:08
Dritare.net
Zyrtarë të lartë të Shteteve të Bashkuara dhe Iranit kanë zhvilluar bisedimet e para që prej muajit qershor, në kuadër të Asamblesë së Përgjithshme të Kombeve të Bashkuara në Nju Jork.
Takimi u zhvillua përmes ndërmjetësimit të Katarit dhe përfshiu ministrin e Jashtëm iranian, Abbas Araghchi, dhe të dërguarin e presidentit amerikan Donald Trump, Steve Witkoff. Deri tani nuk është raportuar për ndonjë marrëveshje konkrete apo përparim të rëndësishëm në negociata.
Pas përfundimit të takimit, Witkoff tha se palët kishin zhvilluar një raund diskutimesh që, sipas tij, mund të rezultojë “konstruktiv dhe premtues”. Ndërkohë, Teherani përsëriti kërkesën që SHBA-ja t'i japë fund asaj që e cilëson si “akte agresioni”.
Bisedimet u zhvilluan në të njëjtën ditë kur presidenti Trump, gjatë fjalimit në Asamblenë e Përgjithshme të OKB-së, paralajmëroi se SHBA-ja mund të ndërmarrë masa edhe më të ashpra ndaj Iranit nëse nuk arrihet një marrëveshje.
Trump deklaroi se përballë tij qëndrojnë dy mundësi: një marrëveshje që do t'i lejonte Iranit të rindërtohej ose, siç u shpreh ai, “asgjësimi” i Republikës Islamike.
Konflikti ka shkaktuar pasoja të mëdha edhe në tregjet ndërkombëtare të energjisë. Ngushtica e Hormuzit, përmes së cilës kalonte para luftës rreth 20% e naftës dhe gazit natyror të lëngshëm në botë, është bllokuar, duke sjellë luhatje të forta të çmimeve.
Që prej rënies së armëpushimit në qershor, SHBA-ja, Izraeli dhe Irani kanë vazhduar përplasjet sporadike. Irani ka sulmuar anije që pretendon se kanë tentuar të kalojnë Ngushticën e Hormuzit pa autorizim, ndërsa SHBA-ja ka goditur objektiva iraniane dhe ka vendosur masa ndaj porteve dhe transportit detar iranian.
Administrata Trump ka paralajmëruar gjithashtu sanksione ndaj vendeve që vazhdojnë tregtinë me Iranin, në përpjekje për të ushtruar presion mbi Teheranin që të pranojë një marrëveshje.
Nga ana tjetër, Irani kërkon që SHBA-ja dhe Izraeli të ndalojnë luftën dhe sulmet ndaj tij dhe ndaj grupeve aleate në rajon.
Bisedimet e fundit në Nju Jork shënojnë një përpjekje të re diplomatike për të gjetur një rrugëdalje nga konflikti, por deri tani nuk ka një marrëveshje të raportuar mes palëve./L.F-dritare.net
