Operacioni ndaj VIP-ave në Turqi/ Afra Saraçoğlu ndalohet në aeroport
Tuesday 22 September 2026, 21:09
Dritare.net
Aktorja e njohur turke Afra Saraçoğlu është ndaluar në Aeroportin e Stambollit menjëherë pas kthimit nga Franca, në kuadër të një hetimi të gjerë që përfshin disa emra të njohur të kinemasë, muzikës dhe ekranit turk.
Saraçoğlu ndodhej jashtë Turqisë kur ishte lëshuar urdhri për ndalimin e saj. Aktorja kishte deklaruar më herët se udhëtimi jashtë vendit ishte planifikuar për arsye pune dhe se do të kthehej në Turqi për të dhënë deklarimet e saj. Pas mbërritjes nga Franca, ajo u ndalua në Aeroportin e Stambollit, iu dorëzua xhandarmërisë dhe më pas u dërgua në spital për kontrollin shëndetësor të parashikuar nga procedura.
Hetimi po zhvillohet nga Prokuroria e Bakırköy-t. Sipas mediave turke, në një nga dosjet po hetohen vepra që lidhen me përdorimin dhe sigurimin e lëndëve narkotike. Autoritetet kanë zhvilluar dy hetime të ndara, në kuadër të të cilave janë lëshuar urdhra ndalimi për gjithsej 24 persona.
Mes personave të ndaluar më herët janë edhe aktorët Aras Bulut İynemli dhe Melis Sezen, reperi Sefo, aktorja Nilperi Şahinkaya dhe ish-futbollisti Hasan Şaş. Aras Bulut İynemli, Sefo, Melis Sezen dhe disa persona të tjerë u lanë të lirë pas përfundimit të procedurave, ndërsa Sayat Zurnacı dhe Aytaç Kart u arrestuan. Nilperi Şahinkaya dhe Hasan Şaş u liruan nën kontroll gjyqësor.
Ndërkohë, këtë të martë është raportuar se edhe Afra Saraçoğlu është lënë e lirë, pasi përfundoi kontrollin shëndetësor, procedurat në Institutin e Mjekësisë Ligjore dhe veprimet në Prokurori.
Saraçoğlu është një nga aktoret më të njohura të brezit të ri në Turqi dhe ka fituar popullaritet të madh edhe jashtë vendit përmes serialeve televizive turke./dritare.net
