Akuza të reja ndaj Russell Brand! Gjashtë gra të tjera denoncojnë aktorin pas dënimit me burg
Friday 13 November 2026, 19:07
Dritare.net
Gjashtë gra të tjera kanë ngritur akuza për sjellje të papërshtatshme seksuale dhe abuzive ndaj komedianit dhe aktorit britanik Russell Brand, vetëm pak ditë pasi ai u dënua me burg për përdhunim dhe sulme seksuale.
Dëshmitë e reja janë publikuar nga gazeta britanike The Times, ndërsa akuza të tjera janë paraqitur edhe në dokumentarin e ri të Netflix, të titulluar Russell Brand: Open Secret, i publikuar këtë të premte.
Brand u dënua në fillim të javës, pasi një gjykatë në Londër e shpalli fajtor për një rast përdhunimi dhe tri raste sulmesh seksuale.
Sipas The Times, gjashtë gra të tjera kanë rrëfyer për sjellje seksuale abuzive dhe shfrytëzuese nga ana e aktorit. Gazeta sqaron se këto dëshmi nuk mund të publikoheshin më herët për shkak të procesit penal që ishte ende në zhvillim.
Akuzat e para ndaj Brand u bënë publike në vitin 2023, pas një hetimi të përbashkët të gazetave The Times, The Sunday Times dhe emisionit investigativ Dispatches të Channel 4.
Aktori ka mohuar vazhdimisht se ka kryer marrëdhënie seksuale pa pëlqimin e personave të përfshirë.
Dëshmitë e reja vijnë në një moment kur çështja e tij ka marrë sërish vëmendje të madhe në Britaninë e Madhe, pas vendimit të gjykatës dhe publikimit të dokumentarit që trajton akuzat ndaj tij.
Policia po shqyrton denoncime të tjera
Policia Metropolitane e Londrës ka konfirmuar se disa persona kanë kontaktuar autoritetet gjatë dhe pas përfundimit të gjyqit, për të dhënë informacione ose për të raportuar vepra të mundshme penale.
Hetuesit po vlerësojnë dëshmitë e reja, ndërsa Brand është tashmë nën hetim edhe për pretendime për përdhunim nga dy gra të tjera.
Aktori 51-vjeçar u dënua më 9 nëntor me 10 vjet e 6 muaj burg, për krime seksuale të kryera ndaj katër grave gjatë periudhës 2004–2009. /dritare.net
