Autopsia zbulon shkakun e vdekjes së aktores Hayden Panettiere
Tuesday 22 September 2026, 17:05
Dritare.net
Aktorja amerikane Hayden Panettiere, e njohur për rolet e saj në serialet “Heroes” dhe “Nashville”, humbi jetën si pasojë e një mbidoze aksidentale nga disa substanca, mes tyre fentanili. Përfundimet janë bërë publike nga Zyra e Mjekut Ligjor të Greenville County në Karolinën e Jugut, pas përfundimit të autopsisë.
Panettiere, 36 vjeçe, u gjet pa ndjenja më 16 gusht në një apartament në Greenville. Ekipet e emergjencës kryen për më shumë se 40 minuta manovra reanimimi, por nuk arritën ta shpëtonin. Autopsia nuk zbuloi shenja traume që mund të kishin ndikuar në vdekjen e saj.
Sipas mjekësisë ligjore, në organizmin e aktores u gjet një kombinim i fentanilit dhe metabolitëve të tij, alprazolamit, ilaçi kundër ankthit i njohur edhe me emrin tregtar Xanax, si dhe një relaksues muskulor dhe një medikament që përdoret për trajtimin e depresionit të rëndë dhe çrregullimeve të tjera. Autoritetet e kanë klasifikuar vdekjen si aksidentale.
Policia e Greenville ka konfirmuar se hetimi për rrethanat e vdekjes së Panettiere vijon. Një përfaqësuese e familjes tha për Associated Press se hetimi është ende në zhvillim dhe se çështja është komplekse.
Hayden Panettiere ishte bërë e famshme që në moshë të re dhe më pas fitoi njohje ndërkombëtare me “Heroes” dhe “Nashville”. Gjatë jetës së saj ajo kishte folur publikisht për problemet me varësinë dhe depresionin pas lindjes, tema që i kishte trajtuar edhe në kujtimet e saj./dritare. net
