Rama paralajmëron ndryshime në inspektime: Asnjë kontroll pa paralajmërim
Wednesday 2 September 2026, 13:01
Dritare.net
Kryeministri Edi Rama ka kërkuar një qasje të re në procesin e inspektimit të bizneseve, me më shumë transparencë, korrektësi dhe mbështetje ndaj sipërmarrjes.
Gjatë një takimi me inspektorë, ku ishin të pranishëm edhe ministrja e Ekonomisë dhe Inovacionit, Delina Ibrahimaj, dhe Inspektori i Përgjithshëm, Dashnor Sula, Rama theksoi se kontrollet rutinë nuk duhet të kryhen më pa paralajmërim.
Sipas kryeministrit, qëllimi i inspektimit nuk duhet të jetë kapja e biznesit në shkelje, por ndihma për përmirësimin dhe respektimin e ligjit.
Rama deklaroi gjithashtu se gjoba duhet të jetë masa e fundit, ndërsa çdo inspektim pa paralajmërim duhet të denoncohet te Inspektori i Përgjithshëm.
Një tjetër ndryshim i paralajmëruar është pajisja e inspektorëve me kamera inteligjente trupore dhe uniforma, në mënyrë që veprimtaria e tyre të jetë e monitoruar dhe transparente.
“Shteti që hyn në derën e njerëzve, duhet t’i bëjë ata krenarë për taksat që ata i paguajnë këtij shteti”, u shpreh Rama./L.F-dritare.net
