Rama mbledh sot socialistët e Tiranës! Veliaj letër Asamblesë!
Dritare.net

Erion Veliaj ka dërguar një tjetër mesazh nga qelia në burgun e Fierit, ndërsa socialistët e Tiranës sot do të takohen me kryetarin e tyre dhe njëkohësisht kryeministrin, Edi Rama. Mbledhja e PS Tiranë do të mbahet në orën 11:00 te Akademia e Arteve. Pritet që zhvillimi i saj të jetë me dyer të mbyllura, por ende s’ka një njoftim zyrtar. Në fokus do të jenë zgjedhjet vendore, ndërsa takimi pason mbledhjen e djeshme me ministrat dhe drejtuesit politikë.
Mesazhin, Veliaj e nënshkruan me “socialisti juaj me duar të lidhura”.
“Mesazh për Asamblenë e Tiranës
Të dashur miq dhe socialistë të Tiranës!
Prej vitit 2015 ndërtuam bashkë një organizatë që besonte te puna, progresi dhe qyteti. Fitoret tona nuk na i dhanë as bandat, as krimi dhe as të fortët. Ato i ndërtuam me djersën e socialistëve dhe qytetarinë e Tiranës.
Po a jemi ende ajo parti?
Hidhni një sy nga shoku në krah. A është ende socialisti me të cilin ndamë betejat dhe fitoret, apo vendin e tij e kanë zënë ministruca e drejtoruca, që pushtojnë territore me privilegje, në vend që të pushtojnë zemrat e qytetarëve?
Më pikëllon të shoh një parti ku drejtuesi u hakërrehet socialistëve që e ngritën në krye, ku mijëra vota e vite sakrificash fshihen me një klithmë të tij dhe ku besnikëria e verbër ndaj tij vlen më shumë se besnikëria ndaj parimeve.
Ne ndërtuam një parti zemrash, jo një hordhi privilegjesh!
Unë sot vërtet i kam duart e lidhura, por jo kujtesën, bindjet dhe përgjegjësinë për atë që ndërtuam bashkë.
Tirana është qyteti i rinisë, kulturës dhe optimizmit. Tirana është zemra jonë e madhe.
Ruajeni qytetarinë dhe djersën socialiste. Mos lejoni që historia jonë të zëvendësohet nga pushteti i pamerituar.
Me mall, respekt, përulje dhe mirënjohje,
Miku dhe shoku juaj,
Socialisti me duar të lidhura
Erion Veliaj”, shkruan ai.