Arben Ahmetaj shkatërroi bujqësinë shqiptare! Shpërthen Erion Braçe!
E Martë 22 Korrik 2025, 21:09
Dritare.net
Në emisionin “Dekalog” me Roland Qafokun në DritareTV, Erion Braçe bëri një deklaratë të drejtpërdrejtë dhe të fortë ndaj ish-ministrit të Financave Arben Ahmetaj, duke e konsideruar përgjegjësin kryesor për informalitetin në sektorin e bujqësisë dhe blegtorisë.
Braçe tha se skema e TVSH-së e miratuar dhe mbështetur nga Ahmetaj ka krijuar pabarazi dhe ka dekurajuar grumbulluesit dhe përpunuesit që të blejnë produkte nga fermerët vendas. Ai theksoi se kjo skemë e ka bërë më të leverdishëm importin sesa blerjen nga prodhimi vendas, duke nxitur kështu informalitetin dhe duke goditur prodhimin bujqësor shqiptar.
Për më tepër, Braçe u shpreh se që në vitin 1998, kur diskutoheshin ndryshimet në skemën e TVSH-së në Komisionin e Ekonomisë, përballë tyre ishte Arben Ahmetaj, si ministër financash, i cili “nuk dëgjonte” dhe që sipas tij “ka qenë dhe mbetet përgjegjësi kryesor për rrënimin e arritjeve në bujqësi e blegtori që nga viti 2018 e këtej”.
Ai shtoi se ka gjashtë vjet që denoncon publikisht problemet që ka krijuar kjo politikë fiskale dhe se propozimet e tij nuk janë dëgjuar, as në grupin parlamentar, as në komisionet përkatëse.
Kritika e Braçes ndaj Arben Ahmetajt është e qartë dhe e drejtpërdrejtë: ai e akuzon për vendosjen dhe mbrojtjen e një skeme tatimore që ka dëmtuar rëndë sektorin bujqësor dhe ka favorizuar importin e produkteve, në dëm të fermerëve dhe përpunuesve vendas./K.C/dritare.net
