Braçe reagon ashpër pas sekuestrimit të 33.000 kg djathë në Divjakë: Nuk është siguri ushqimore, është varrosje e një punëtori!
E Martë 22 Korrik 2025, 10:10
Dritare.net
Deputeti socialist Erion Braçe ka reaguar ashpër në emisinin Dekalog nga Roland Qafoku në Dritare TV pas një aksioni të zhvilluar nga administrata tatimore dhe Autoriteti Kombëtar i Ushqimit (AKU), në një baxho të vogël në fshatin Zharnec të Divjakës. Objekt kontrolli ka qenë baxhoja e Tan Mebellit, ku autoritetet kanë sekuestruar 33 mijë kilogramë djathë, prodhim i muajve të fundit për sezonin turistik, dhe kanë vendosur një gjobë në vlerën e 40 milionë lekëve.
Deputeti socialist tha se situata është thellësisht e padrejtë dhe tregon për një sistem që godet prodhuesit e ndershëm.
"Jam shumë i prekur dhe më bie mua barra të flas, sepse atje nuk e hap njeri gojën. Askush nuk ka vënë në dyshim faktin që djathi i tij është qumësht safi", deklaroi Braçe.
Ai sqaroi se arsyeja e sekuestrimit nuk lidhet me cilësinë apo sigurinë ushqimore të produktit, por me mungesën e autofaturës që dëshmon blerjen e qumështit nga fermerët lokalë.
"I kanë kërkuar autofaturën me të cilën ka blerë qumështin e fermerit. Atë që ekzaktësisht është problemi! Nuk është sekuestruar djathi sepse është i dëmshëm se mund të ketë qumësht pluhur. I është sekuestruar 33 mijë kg djathë për mungesë të një dokumenti, një fature që askush në këtë sistem nuk e ka. Dhe për ta varrosur deri në fund, i kanë vënë edhe 40 milionë lekë gjobë," tha Braçe.
Deputeti theksoi se kjo situatë nuk do të ndodhte me fabrikat e mëdha të përpunimit të qumështit, të cilat sipas tij funksionojnë mbi baza të tjera dhe shpesh përfitojnë nga skemat fiskale pa u penalizuar.
Braçe ka kritikuar ashpër strukturat tatimore dhe Autoritetin Kombëtar të Ushqimit, duke i akuzuar për goditje selektive ndaj prodhuesve të vegjël dhe për moszbatimin e njëtrajtshëm të ligjit në të gjithë zinxhirin e përpunimit të ushqimit./L.F-dritare.net
