Kush po e shkatërron Liqenin e Tiranës? Flet Erion Braçe!
E Hënë 21 Korrik 2025, 22:10
Dritare.net
Liqeni i Tiranës po përballet me një rrezik serioz, paralajmëron deputeti i PS-së, Erion Braçe. Ai thekson se mbushja e liqenit nga lumi dhe ndërprerja e burimeve natyrore po sjellin degradim të rëndë të kësaj hapësire që është shumë e rëndësishme për qytetin.
Në një intervistë në emisionin “Dekalog” nga Roland Qafoku në DritareTV, Braçe u shpreh:
“Liqeni i Tiranës është rreziku më i madh për shkak të mbushjes që i vjen nga lumi dhe ndërprerjes së burimeve të tij. Ndërtimet dhe ndërhyrjet pa plan po e dëmtojnë rëndë.”
Ai shtoi:
“Liqeni i Thatë, që furnizonte me ujë të freskët liqenin e Tiranës, është duke humbur funksionin e vet. Kjo ndikon drejtpërdrejt në degradimin e liqenit.”
Braçe theksoi edhe ndikimin e ndotjes dhe ndryshimeve klimatike:
“Ujërat e zeza që vijnë nga pjesa e sipërme ndotin liqenin, edhe pse në sasi të vogla, por prezenca e tyre është problematike. Ndryshimet klimatike dhe periudhat e thatësirës e përkeqësojnë gjendjen.”
Ai bëri thirrje për:
“Ndërhyrje të menjëhershme dhe angazhim të ekspertëve që kanë njohuri historike për liqenin, për të gjetur zgjidhje të qëndrueshme.”
Në lidhje me hapësirat publike pranë liqenit, Braçe deklaroi:
“Parku është për ecje, qetësi dhe bukuri, jo për shfaqje apo koncerte masive që e prishin ambientin dhe rrënojnë funksionin publik.”
Ai përfundoi duke theksuar:
“Liqeni është një pasuri e çmuar për Tiranën dhe duhet mbrojtur me çdo kusht, për të qenë pjesë e jetës së përditshme të qytetarëve.”/K.C/dritare.net
