Fotot/ Momentet pikante të seancës maratonë për territorialen
Friday 9 October 2026, 09:09
Dritare.net
Pas 14 orësh debatesh dhe tensionesh, Kuvendi i Shqipërisë miratoi pak pas mesnate reformën e re administrativo-territoriale, që parashikon reduktimin e numrit të bashkive nga 61 në 46. Deputeti socialist Erion Braçe, pavarësisht kritikave të forta ndaj projektligjit, votoi pro, duke deklaruar se do ta sqarojë vendimin e tij.
Kuvendi i Shqipërisë miratoi me 85 vota pro reformën e re territoriale, pas një seance maratonë që zgjati rreth 14 orë dhe u shoqërua me debate të ashpra mes mazhorancës dhe opozitës.
Ndarja e re administrative parashikon uljen e numrit të bashkive në vend nga 61 në 46, ndërsa opozita kundërshtoi projektligjin, duke pretenduar se procesi ishte zhvilluar pa konsultimin e duhur me qytetarët.
Një nga zhvillimet më të komentuara të seancës ishte vota pro e deputetit socialist Erion Braçe, i cili kishte kritikuar hapur reformën dhe mënyrën se si ishte hartuar ajo. Gjatë fjalës së tij në Kuvend, Braçe argumentoi se parimet e reformës nuk ishin zbatuar në mënyrë të njëtrajtshme dhe se ndryshimet do të ndikonin drejtpërdrejt në jetën e qytetarëve në disa bashki.
Pavarësisht këtyre kundërshtimeve, në momentin e votimit ai ngriti kartonin jeshil. Pas përfundimit të seancës, i pyetur nga gazetarët për arsyet e vendimit, Braçe u shpreh: “Jam kundër, do e sqaroj nesër”.
Në sallë ishte i pranishëm edhe kryeministri Edi Rama, ndërsa pak para votimit u shfaq edhe Belinda Balluku. Prania e saj u shoqërua me tensione, ku deputetë të opozitës hodhën ujë, shishe dhe vezë në drejtim të përfaqësuesve të mazhorancës.
Gjatë diskutimeve, opozita kërkoi tërheqjen e projektligjit dhe zhvillimin e një referendumi për ndarjen e re territoriale. Kreu i Partisë Demokratike, Sali Berisha, argumentoi se qytetarët duhet të kenë mundësinë të shprehen për ndryshimet e propozuara.
Nga ana tjetër, kreu i grupit parlamentar të Partisë Socialiste, Taulant Balla, deklaroi se votimi do të zhvillohej, duke ftuar opozitën të marrë pjesë në diskutimet e ardhshme për kompetencat e pushtetit vendor.
Ndërkohë, përveç Braçes, edhe deputeti socialist Vullnet Sinaj votoi pro reformës. Miratimi i projektligjit shënon një tjetër zhvillim të rëndësishëm në organizimin administrativ të vendit, ndërsa mbeten për t'u parë efektet që ndarja e re do të ketë në funksionimin e bashkive dhe në shërbimet për qytetarët./L.F-dritare.net
