Halloween 2026/ Heidi Klum i lë të gjithë pa fjalë! Ja si u veshën VIP-at!
Sunday 1 November 2026, 12:12
Dritare.net
Heidi Klum ka dëshmuar edhe një herë pse cilësohet si “Mbretëresha e Halloween-it”. Modelja 53-vjeçare ka surprizuar të gjithë me kostumin e saj të pazakontë për festën e këtij viti, duke u shndërruar në një dorë gjigante të prerë, me detaje aq realiste sa dukej sikur kishte dalë nga një film horror.
Si çdo vit, Klum organizoi festën e saj tradicionale të Halloween-it, këtë herë në restorantin Cathédrale në Nju Jork, ku morën pjesë shumë personazhe të njohur të botës së spektaklit, mes tyre Taylor Momsen, Eric McCormack dhe Valentina Sampaio.
Pak orë përpara se të shfaqej në tapetin e kuq, modelja ndau me ndjekësit në rrjetet sociale pamje nga përgatitjet dhe procesi i transformimit. Ajo kujtoi gjithashtu disa prej kostumeve të saj më të famshme ndër vite, duke e shtuar edhe më shumë kuriozitetin për surprizën e radhës.
Kur më në fund zbuloi kostumin, të gjithë mbetën të habitur. Heidi ishte futur brenda një strukture gjigante që imitonte një dorë të majtë të shkëputur nga trupi. Këmbët e saj ishin shndërruar në dy gishta, ndërsa pjesa tjetër e trupit ishte fshehur brenda pëllëmbës.
Kostumi hiperrealist përfshinte vena, tendina, rrudha, thonj të gjatë të kuq, gishtin e madh dhe madje edhe unazat e saj. Sipas modeles, venat dhe vijat e pëllëmbës ishin realizuar duke marrë si model dorën e saj të vërtetë.
Për realizimin e këtij transformimi ishte punuar për muaj të tërë, ndërsa vetëm përgatitjet për ta veshur kostumin ditën e festës zgjatën rreth gjashtë orë.
Heidi Klum njihet prej vitesh për kostumet e saj spektakolare të Halloween-it, duke u shndërruar në personazhe dhe krijesa nga më të pazakontat. Edhe këtë 31 tetor 2026, ajo arriti të tërhiqte vëmendjen me një transformim që u bë menjëherë temë diskutimi në mediat rozë.
Një nga detajet më të veçanta ishte edhe prania simbolike e bashkëshortit të saj, Tom Kaulitz, përmes tatuazhit me emrin e tij në gishtin e unazës. Muzikanti nuk mori pjesë në festë për shkak të angazhimeve në turne.
Festa shënoi 25-vjetorin e organizimit të këtij eventi nga Heidi Klum, e cila vazhdon të tërheqë vëmendjen çdo Halloween me krijimet e saj origjinale./dritare.net
