Do ta sulmojë? Putin kërcënon Britaninë: Është sekret ushtarak…
Wednesday 2 September 2026, 19:07
Dritare.net
Presidenti rus Vladimir Putin ka lënë të hapur mundësinë që Moska të godasë objektiva ushtarake në Mbretërinë e Bashkuar, në përgjigje të furnizimit të Ukrainës me armë britanike. I pyetur në një konferencë për shtyp në Bishkek të Kirgistanit nëse Rusia mund të sulmojë objektiva ushtarake në Britani, Putin u përgjigj shkurt: “Është sekret. Sekret ushtarak.”
Përgjigjja nuk ishte as një “po”, as një “jo”, duke lënë të paqartë se cilat mund të jenë planet e Moskës. Pikërisht kjo paqartësi shihet si pjesë e presionit psikologjik të Kremlinit, për ta mbajtur Britaninë dhe vendet e tjera perëndimore në pasiguri mbi qëllimet e Rusisë.
Mesazhi vjen në një kohë kur Britania është ndër mbështetëset më të forta të Ukrainës dhe vazhdon të furnizojë Kievin me armë. Retorika kërcënuese ndaj Londrës është shfaqur edhe në mediat ruse. Gazeta Moskovsky Komsomolets kishte shkruar së fundmi se kryeministri britanik Andy Burnham duhet ta shohë Rusinë jo në ëndrrat e tij, “por në makthet e tij”.
Megjithatë, nuk ka të dhëna që tregojnë se Rusia po përgatitet të godasë me raketa objektiva në territorin britanik. Por zhvillimet e fundit në Evropë kanë rritur shqetësimet për zgjerimin e operacioneve hibride ruse.
Gjermania ka deklaruar se Rusia ishte përgjegjëse për sulmin me dron të muajit të kaluar në aeroportin e Leipzigut. Presidenti Putin e ka kundërshtuar akuzën, duke e cilësuar si “mbjellje provash”, ndërsa ministri i Brendshëm gjerman Alexander Dobrindt e përshkroi ngjarjen si pjesë të një “modeli të mirëpërcaktuar të operacioneve hibride ruse në Evropë”.
Pyetja që ngrihet tashmë është nëse operacione të tilla mund të intensifikohen edhe në Britani.
Por në konferencën për shtyp në Bishkek, kërcënimet e Putinit nuk u drejtuan vetëm ndaj Mbretërisë së Bashkuar. Presidenti rus përdori një gjuhë të ashpër edhe ndaj Perëndimit në tërësi, duke i krahasuar vendet perëndimore me “peshkaqenë”.
“Nëse dikush përpiqet të na tërheqë poshtë në zinxhirin ushqimor, të na përpijë ose të na gllabërojë, mund të marrë një grusht në dhëmbë”, deklaroi Putin, duke shtuar se Rusia është e gatshme ta bëjë këtë, pavarësisht “oreksit dhe dhëmbëve gjithnjë e më të mëdhenj të këtyre peshkaqenëve”.
Presidenti rus po përdor gjithnjë e më shumë metafora nga bota e kafshëve për të përshkruar përplasjen gjeopolitike. Së fundmi, ai kishte folur edhe për orkat që “shqyejnë arinjtë polarë”, në një përpjekje për të justifikuar luftën e Rusisë kundër Ukrainës.
Konferenca në kryeqytetin e Kirgistanit ofroi gjithashtu një pamje të qartë të qëndrimit të Putinit për luftën dhe përplasjen me Perëndimin. Për rreth 45 minuta, ai iu përgjigj pyetjeve të gazetarëve rusë dhe u shfaq luftarak, i bindur për fitoren dhe energjik.
Pavarësisht se lufta nuk ka shkuar sipas planeve të Moskës, Rusia ka pësuar humbje të mëdha në fushën e betejës, ndërsa ekonomia ruse vijon të përballet me presion të konsiderueshëm.
Megjithatë, Putin deklaroi me bindje: “Nuk kam asnjë dyshim se armiku do të shembet.”
Lufta ka hyrë tashmë në vitin e saj të pestë, ndërsa Ukraina vazhdon rezistencën dhe mbështetja perëndimore për Kievin mbetet një prej çështjeve kryesore në përplasjen mes Moskës dhe Perëndimit./K.C/dritare.net
