Sekretari amerikan i Mbrojtjes, Pete Hegseth dhe kreu i Shtabit të Përgjithshëm, gjenerali Dan Caine, dhanë sot një deklaratë për shtyp në Pentagon lidhur me operacionin ushtarak amerikan të fundjavës së kaluar që goditi tre objekte bërthamore në Iran. Pas këtij sulmi, Irani u kundërpërgjigj me raketa ndaj bazës ajrore amerikane Al Udeid në Doha, Katar.
Sekretari i Mbrojtjes, Pete Hegseth, këmbënguli se sulmet amerikane “e shkatërruan programin bërthamor të Iranit”, duke theksuar fuqinë e bombave të përdorura dhe suksesin e misionit “Operacion Midnight Hammer”.
Detajet e reja që u zbuluan:
Operacioni shkoi sipas planit: Gjenerali Caine tha se bombat 30 mijë paundëshe që u përdorën funksionuan siç duhet dhe shpërthyen me sukses. Këtë e konfirmuan avionët pasues dhe inteligjenca ajrore që dokumentoi impaktin në kohë reale.
Iranianët tentuan të mbulonin objektet me beton: Para sulmit, forcat iraniane tentuan të mbulonin hyrjet e centralit në Fordow me beton. Sipas Caine, bomba e parë e hoqi me forcë këtë mbulim dhe ekspozoi tunelin kryesor.
Asgjë nuk u largua nga objektet: Sipas një postimi të Trump në rrjetin Truth Social dhe të dhënave të Pentagonit, në vendngjarje ishin thjesht punëtorë betoni, jo personel që largonte materiale sensitive. Hegseth shtoi: “Nuk kam parë asnjë informacion që të sugjerojë se ndonjë material është zhvendosur apo fshehur.”
"Shkatërrim" vs. "dëmtim" – debat mbi vlerësimin e dëmit: Hegseth e justifikoi përdorimin e termit “shkatërrim” me fuqinë e armëve të përdorura. Megjithatë, gjenerali Caine nuk dha një vlerësim përfundimtar të dëmeve dhe tha se “nuk ka qenë kurrë nën presion” nga Trump apo Hegseth për të ndryshuar informacionin e inteligjencës.
Në përfundim, Pentagoni po përpiqet të forcojë narrativën e suksesit të operacionit, ndërsa ende mbetet e paqartë përmasat reale të dëmit në programin bërthamor iranian. Kjo vjen në një klimë të tensionuar gjeopolitike, ku çdo deklaratë ka ndikim të madh ndërkombëtar./K.C/dritare.net
