Kryeministri francez Sébastien Lecornu jep dorëheqjen, vetëm 26 ditë pas emërimit
E Hënë 6 Tetor 2025, 10:10
Dritare.net
Kryeministri francez Sébastien Lecornu ka dhënë dorëheqjen vetëm 26 ditë pas emërimit, në një zhvillim të papritur që ka tronditur skenën politike në Francë.
Lajmi u konfirmua nga Pallati Élysée, pak orë pasi kabineti i ri i Lecornu u shpall zyrtarisht. Kryeministri dorëzoi dorëheqjen pas një takimi njëorësh me presidentin Emmanuel Macron të hënën në mëngjes.
Dorëheqja e tij vjen pas vetëm tre javësh në detyrë, pasi ai u emërua më 10 shtator, pas rrëzimit të qeverisë së mëparshme të François Bayrou.
Kabineti i ri i prezantuar nga Lecornu kishte shkaktuar reagime të ashpra nga disa parti në Asamblenë Kombëtare, të cilat e kritikuan për faktin se ishte “pothuajse identik” me qeverinë e Bayrou. Disa prej tyre kishin paralajmëruar se do të votonin kundër kabinetit në seancën e miratimit parlamentar.
Ky zhvillim përbën një tjetër goditje për administratën e presidentit Macron, e cila prej muajsh përballet me paqëndrueshmëri politike dhe tensione të brendshme pas zgjedhjeve parlamentare të fundit.
Nuk dihet ende se kush do të marrë drejtimin e përkohshëm të qeverisë franceze, por pritet që Macron të nisë konsultimet urgjente për emërimin e një kryeministri të ri në ditët në vijim./L.F-dritare.net
