Hiqej si prokuror dhe mashtronte qytetarët, kapet në Sarandë 49-vjeçari
E Enjte 9 Tetor 2025, 14:02
Dritare.net
Një 49-vjeçar ka rënë sot në prangat e Policisë së Sarandës, pasi prezantohej rremë si prokuror dhe mashtronte qytetarët për përfitime personale.
Sipas hetimeve, Alban Muço kishte ngritur një strukturë fiktive me disa persona, të cilëve u kishte premtuar se i kishte punësuar si “agjentë të policisë gjyqësore” pranë Prokurorisë së Përgjithshme. Ai u caktonte atyre detyra të ndryshme, madje i përdorte edhe si shoferë personalë.
Personat e mashtruar, duke besuar në funksionin e rremë të 49-vjeçarit, mbulonin vetë shpenzimet e udhëtimit, karburantit, ushqimit dhe strehimit, me bindjen se do të rimbursoheshin nga institucioni i Prokurorisë së Përgjithshme.
Njoftimi i policisë:
"Si rezultat i veprimeve të shpejta dhe profesionale të kryera nga specialistët për Hetimin e Krimeve të Komisariatit të Policisë Sarandë, në drejtimin e Prokurorisë, pas marrjes së informacionit se një shtetas prezantohej si funksionar publik, për qëllime përfitimi, organizuan dhe finalizuan operacionin policor të koduar “Deceiver”.
Në kuadër të këtij operacioni u bë e mundur kapja dhe arrestimi në flagrancë i shtetasve:
-A. M., 49 vjeç, banues në Tiranë, për veprat penale “Mashtrimi”, “Përvetësimi i titullit apo i detyrës shtetërore” dhe “Largimi i të burgosurit nga vendi i qëndrimit”;
-E. Ç., 19 vjeç, banues në Sarandë, për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Nga hetimet dyshohet se duke u prezantuar si prokuror dhe duke i premtuar se do të paguheshin nga institucioni i Prokurorisë, shtetasi A. M. ka punësuar disa shtetas në shërbim të tij, të cilëve ia ka shkaktuar dëm të konsiderueshëm ekonomik. Gjithashtu, ka kërkuar favore në institucione dhe subjekte të ndryshme.
Nga verifikimet e kryera, rezultoi se 49-vjeçari ishte në kërkim pasi kishte thyer masën e sigurisë “Arrest në shtëpi”, caktuar nga Gjykata, për veprën penale “Mashtrimi”, pasi është paraqitur në institucione dhe iu ka marrë para qytetarëve, duke u prezantuar si prokuror.
Në vijim të veprimeve hetimore për dokumentimin e rastit, u krye kontroll në banesën e shtetasit E. Ç., në Sarandë, ku qëndronte shtetasi A. M. Gjatë kontrollit u gjetën dhe u sekuestruan në cilësinë e provës materiale, 1 armë zjarri automatik tip “Shars”, municion luftarak dhe dokumente të ndyshme zyrtare, radio si të Policisë dhe një kompjuter të cilat dyshohen se janë përdorur nga shtetasi A. M., për mashtrime.
Materialet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme procedurale.", thuhet në njoftim./K.C/dritare.net
