Blegtorë shqiptarë, ja çfarë duhet të mësojmë nga modeli austriak!
Tuesday 4 August 2026, 11:11
Dritare.net
DritareTV vizitoi në Austri Institutin Kombëtar të Blegtorisë, ku fermerët dhe specialistët trajnohen, njihen me teknologjitë më të reja dhe me modelet që e kanë bërë Austrinë një nga vendet më të suksesshme në këtë sektor.
Gjatë vizitës në Qendrën Kombëtare Austriake të Gjedhit u prezantuan teknologjitë më të reja, metodat e trajnimit dhe modelet moderne të menaxhimit të fermave. Specialisti austriak Hans Spernbauer tha për DritareTV se Shqipërisë nuk i mungojnë lopët, por fermerët e kualifikuar. Sipas tij, importimi i racave të huaja apo blerja e pajisjeve moderne nuk mjafton për zhvillimin e blegtorisë.
“Një lopë e mirë pa një fermer të aftë nuk shërben për asgjë”, ishte mesazhi i ekspertit austriak. Edhe kafshët që kanë potencial të prodhojnë mbi 10 mijë litra qumësht në vit nuk mund ta arrijnë këtë rezultat pa ushqyerjen e duhur, menaxhim profesional dhe shërbim veterinar cilësor.
Spernbauer theksoi se suksesi i Austrisë mbështetet te edukimi i vazhdueshëm i fermerëve dhe investimi te brezi i ri. Në këtë vend, fëmijët njihen me blegtorinë që në moshën 3–4-vjeçare, përmes programeve që u mundësojnë të vizitojnë fermat, të kujdesen për viçat dhe të kuptojnë procesin e prodhimit bujqësor. Trajnimi vijon edhe për të rinjtë e moshës 15–18 vjeç, si dhe për fermerët profesionistë.
Falë këtij sistemi, shumë fermerë austriakë janë në gjendje të kryejnë vetë procedura të specializuara. Rreth 61% e inseminimeve artificiale në vend realizohen nga fermerët e trajnuar.
Një tjetër element i rëndësishëm është bashkëpunimi. Fermerët austriakë organizohen në shoqata dhe rrjete, pasi një fermë e izoluar e ka të vështirë të përballojë konkurrencën dhe kostot e tregut.
Modeli austriak mbështetet gjithashtu te kontrolli i cilësisë dhe besimi i konsumatorëve. Certifikimi “AMA Gütesiegel” garanton origjinën, cilësinë, mirëqenien e kafshëve dhe gjurmueshmërinë e produkteve. Kjo sigël njihet dhe besohet nga rreth 95% e popullsisë austriake./E.P-dritare.net
