Balla-Bardhit: Plotësoji kërkesat protestuesve, çoje Saliun në burg
Thursday 23 July 2026, 10:10
Dritare.net
Një përplasje verbale është shënuar në sallën e Kuvendit mes kreut të grupit parlamentar të Partisë Socialiste, Taulant Balla, dhe kreut të grupit parlamentar të Partisë Demokratike, Gazment Bardhi.
Debati nisi pasi Bardhi kundërshtoi projekt-kalendarin e Kuvendit dhe kërkoi që kërkesat e protestuesve jashtë Parlamentit të përfshihen në punën e Kuvendit. Ai gjithashtu kërkoi ndalimin e përdorimit të forcës ndaj protestuesve.
Gazment Bardhi tha:
“Së pari, ky Kuvend duhet t’i kërkojë Policisë së Shtetit të ndalë menjëherë dhunën ndaj qytetarëve që protestojnë jashtë. Është e papranueshme që sot godina e Kuvendit të ketë një perimetër të zgjeruar, a thua se qytetarët tanë na rrezikojnë ne. Pa diskutim, Taulant, rrezikojnë të të bëjnë pis kostumin me vezë, e di që e ke të shtrenjtë.”
Bardhi vijoi duke akuzuar policinë për përdorim të mjeteve disproporcionale ndaj protestuesve dhe tha se kërkesat e qytetarëve duhet të merren në konsideratë nga Kuvendi. Në përgjigje, Taulant Balla iu drejtua Bardhit duke komentuar deklaratat e tij për kostumin dhe protestuesit.
Taulant Balla tha:
“Sa i përket pjesës së kostumit, nuk e mbush dot as nuk e kënaq dot kostumin tim. Është keqardhje e madhe që kreu i grupit të PD, PD e vlerave të mëdha, e përfundon diskutimin kështu.”
Balla gjithashtu iu përgjigj kërkesës së Bardhit për plotësimin e kërkesave të protestuesve, duke iu referuar ish-kryeministrit Sali Berisha.
“Doni t’ia plotësoni kërkesat protestuesve. Saliu në burg, plotësoja pra, çoje Saliun në burg. Ia plotëson dot kërkesën.”/L.F-dritare.net
