Marrëveshje historike! SHBA i jep Arabisë Saudite dritën jeshile për program bërthamor
Wednesday 22 July 2026, 16:04
Dritare.net
Administrata e presidentit amerikan Donald Trump pritet të shpallë këtë të mërkurë një marrëveshje historike me Arabinë Saudite, e cila do t'i hapë rrugën mbretërisë për zhvillimin e një programi civil bërthamor. Sipas mediave amerikane, marrëveshja parashikon bashkëpunim afatgjatë mes dy vendeve dhe mund të vlejë miliarda dollarë për kompanitë amerikane.
Sipas raportimeve, plani do t'i lejojë Arabisë Saudite, pas një studimi të përbashkët me SHBA-në, të pasurojë uranium në territorin e saj për prodhimin e karburantit për centrale bërthamore, në një impiant që do të ndërtohet nga kompani amerikane. Uraniumi i pasuruar përdoret për prodhimin e energjisë, por mund të shërbejë edhe për zhvillimin e armëve bërthamore, çka ka ngritur shqetësime mes ekspertëve të sigurisë.
Marrëveshja, e cila sipas Wall Street Journal do të ketë një afat 30-vjeçar, është miratuar tashmë nga presidenti Trump dhe do t'i dërgohet për shqyrtim Kongresit amerikan. Nëse SHBA do të kundërshtojë pasurimin e uraniumit në Arabinë Saudite pas studimit të përbashkët, Riadi nuk do të mund ta realizojë këtë proces as i vetëm dhe as me një partner tjetër të huaj për një periudhë 10-vjeçare.
Një tjetër element që ka tërhequr vëmendjen është fakti se marrëveshja nuk kushtëzohet me njohjen diplomatike të Izraelit nga Arabia Saudite. Sipas New York Times, administrata Trump nuk e ka lidhur këtë bashkëpunim me normalizimin e marrëdhënieve mes Riadit dhe Tel Avivit, një objektiv që administratat amerikane e kanë ndjekur prej vitesh.
Marrëveshja ka ngjallur shqetësime edhe në Izrael dhe te mbështetësit e mosshpërndarjes së armëve bërthamore, të cilët paralajmërojnë se një program i tillë mund t'i japë Arabisë Saudite kapacitete që në të ardhmen mund të përdoren për zhvillimin e armëve bërthamore. Princi i Kurorës Mohammed bin Salman ka deklaruar më herët se vendi i tij nuk synon të ndërtojë armë bërthamore, por ka paralajmëruar se nëse Irani do të pajiset me bombë bërthamore, Arabia Saudite do të ndjekë të njëjtën rrugë./dritare.net
