Kamioni ra nga mbikalimi pas përplasjes, policia zbardh detajet e aksidentit te TEG-u
Wednesday 22 July 2026, 17:05
Dritare.net
Policia ka dhënë detaje për aksidentin e rëndë të ndodhur pasditen e sotme te rrethrrotullimi i TEG-ut, ku një kamion pompë betoni u përplas me një automjet dhe përfundoi në aksin rrugor TEG–Elbasan. Nga përplasja, një person ka humbur jetën dhe dy të tjerë kanë mbetur të plagosur.
"Rreth orës 16:20, te rrethrrotullimi i TEG-ut, një kamion (pompë betoni) është përplasur me një automjet. Si pasojë e përplasjes, kamioni (pompë betoni) ka çarë barrierat metalike mbrojtëse të rrethrrotullimit dhe ka rënë në nivelin e poshtëm të aksit rrugor TEG–Elbasan, në drejtim të Elbasanit.
Për pasojë, njëri prej personave që udhëtonte në kamion (pompë betoni) dyshohet se ka humbur jetën në vendngjarje, ndërsa personi tjetër është transportuar në spital, në gjendje të rëndë shëndetësore.
Dy personat që ndodheshin në kamion (pompë betoni) janë ende të paidentifikuar dhe po punohet për përcaktimin nëse personi që ka humbur jetën në vendngjarje ishte drejtuesi i kamionit apo ishte personi që ndodhet në spital.
Ndërkohë, drejtuesi i automjetit tjetër, shtetasi R. N., rreth 28 vjeç, është dërguar në spital dhe ndodhet jashtë rrezikut për jetën.
Në vendngjarje ndodhen shërbimet e Policisë dhe grupi hetimor, të cilët po punojnë për sqarimin e plotë të rrethanave dhe shkakut të aksidentit.", thuhet në njoftim./K.C/dritare.net
