Spanja përplaset me disa vende të BE-së pas krizës së emigrantëve në Ceuta: “Reagim egoist dhe polarizues”
Saturday 1 August 2026, 12:12
Dritare.net
Spanja ka kritikuar ashpër reagimin e disa vendeve të Bashkimit Europian pas fluksit masiv të emigrantëve nga Maroku drejt enklavës spanjolle të Ceutës, duke e cilësuar atë si “egoist, polarizues dhe të paligjshëm”.
Sipas autoriteteve spanjolle, shumica dërrmuese e rreth 60 mijë personave që mbërritën në Ceuta janë kthyer në Marok, ndërsa bilanci i viktimave ka shkuar në 67 persona.
Kryeministri spanjoll Pedro Sánchez i ka shprehur shqetësim presidentes së Komisionit Europian, Ursula von der Leyen, për reagimet e disa qeverive europiane, të cilat sipas tij kanë zgjedhur të sulmojnë Spanjën në vend që të tregojnë solidaritet.
Sánchez deklaroi se brenda më pak se 48 orësh Spanja kishte rikthyer kontrollin mbi kufirin dhe kishte parandaluar lëvizjet e paligjshme drejt Europës kontinentale.
Përplasjet diplomatike nisën pasi Italia vendosi përkohësisht pezullimin e marrëveshjes së zonës Schengen me Spanjën, ndërsa kryeministrja italiane Giorgia Meloni e cilësoi situatën si “shokuese” dhe kërcënim për sigurinë kombëtare. Finlanda dhe Danimarka mbështetën këtë qëndrim, ndërsa edhe vende të tjera kërkuan forcim të kontrolleve kufitare.
Spanja reagoi duke kërkuar “solidaritet europian dhe jo demagogji politike”, ndërsa ministri i Brendshëm Fernando Grande-Marlaska tha se situata në Ceuta po kthehet nën kontroll.
Kryeministri Sánchez fajësoi rrjetet e trafikimit të qenieve njerëzore për valën e paprecedentë të emigrantëve, duke e cilësuar ngjarjen si “shkelje të integritetit territorial të Spanjës”.
Ceuta dhe Melilla, dy enklavat spanjolle në Afrikën e Veriut, përbëjnë kufijtë e vetëm tokësorë të Bashkimit Europian me kontinentin afrikan dhe prej vitesh janë pika të rëndësishme kalimi për emigrantët që synojnë Europën.
