Ministri i Mbrojtjes, Pirro Vengu: Forca Tokësore, 25 vite rrugëtim
E Premte 29 Gusht 2025, 15:03
Dritare.net
Në përvjetorin e ristrukturimit të Forcës Tokësore, Ministri i Mbrojtjes, Pirro Vengu, ka mbajtur një fjalë ku theksoi rolin jetik të saj në konsolidimin e ushtrisë dhe forcimin e shtetit shqiptar.
“Prej çerek shekulli, Forca Tokësore ka kaluar nëpër sfida të shumta. Me themele të shëmbura nga paudhësia politike e tranzicionit në vitet ’90, ajo u ringrit prej vitit 2000 për t’u bërë pararojë në procesin e anëtarësimit në NATO”, u shpreh ministri.
Vengu vuri në dukje kontributin e Forcës Tokësore në misionet ndërkombëtare, por edhe në operacionet brenda vendit për mbrojtjen e jetës, territorit dhe pasurisë mjedisore. “Çdo herë e pranishme. Çdo herë e gatshme”, tha ai, duke theksuar se uniforma ushtarake nuk është thjesht një shenjë dalluese, por një mburojë për vendin dhe një shërbim i përditshëm ndaj shoqërisë.
Ministri i Mbrojtjes nënvizoi se modernizimi dhe investimet në pajisje dhe në kapacitete njerëzore mbeten prioritet i qeverisë:
“Modernizimi, investimet në pajisje dhe në kapacitete njerëzore janë një detyrë parësore. Një detyrë përmes së cilës ripërtërihet pakti shtetformues për lirinë dhe prosperitetin e kombit”, u shpreh Vengu.
Ky përvjetor, sipas ministrit, është kujtesa se ushtria dhe shteti shqiptar ecin bashkë në një proces të pandashëm, ku Forca Tokësore mbetet themel i sigurisë dhe sovranitetit të vendit./L.F-dritare.net
