KLGJ: Deklaratat ndaj gjyqtarëve cënojnë pavarësinë e drejtësisë
E Premte 29 Gusht 2025, 18:06
Dritare.net
Këshilli i Lartë Gjyqësor ka reaguar pas deklaratave të kryeministrit Edi Rama lidhur me vendimet e gjykatave për çështjet e hapësirave publike dhe private. Në një deklaratë për mediat, KLGJ thekson se sulmet verbale ndaj gjyqtarëve cenojnë figurën, dinjitetin dhe pavarësinë e pushtetit gjyqësor.
“Deklarata të tilla minojnë pavarësinë e gjyqtarëve, të cilët në një shtet demokratik duhet të ushtrojnë funksionet vetëm mbi bazën e Kushtetutës dhe ligjit, të lirë nga çdo ndikim i jashtëm,” thuhet në reagim.
Këshilli rikujton se e vetmja mënyrë për të kundërshtuar një vendim gjyqësor është ndjekja e rrugës ligjore përmes ankimimit në një gjykatë më të lartë. Çdo pretendim mbi sjelljen apo integritetin e gjyqtarëve, sipas KLGJ-së, duhet të trajtohet nga institucionet përkatëse dhe jo përmes deklaratave publike.
Duke shprehur mbështetjen për gjyqtarët, KLGJ i inkurajon ata të vijojnë ushtrimin e funksioneve në mënyrë të pavarur e të përgjegjshme, si një element thelbësor për shtetin e së drejtës dhe rrugëtimin e Shqipërisë drejt Bashkimit Evropian./L.F/dritare.net
