Thjeshtësia që bëri 160 miliardë: Jeta dhe mësimet e Warren Buffett
E Premte 29 Gusht 2025, 17:05
Dritare.net
Në moshën 95-vjeçare, Warren Buffett mbetet një figurë unike e kapitalizmit amerikan. Edhe pse në maj të këtij viti shpalli tërheqjen nga funksionet operative të Berkshire Hathaway, kompania që ai e transformoi nga një fabrikë tekstilesh në një nga holdingët financiarë më të fuqishëm në botë, Buffett vazhdon të punojë dhe të shfaqë humorin e tij karakteristik: “Nuk do të rri në shtëpi të shoh telenovela”, ka thënë me ironi.
Nga fëmija i apasionuar pas tregjeve te “investitori më i madh në botë”
I lindur në Omaha, Nebraska, në vitin 1930, në kulmin e Depresionit të Madh, Buffett u dashurua që në fëmijëri me botën e numrave. Në moshën 11-vjeçare bleu aksionin e parë, ndërsa në 13 bëri deklaratën e tij të parë të të ardhurave. Shpesh thotë: “Të gjesh pasionin tënd është diçka madhështore”.
Pas një rinie të vështirë e plot punë të vogla – mes tyre shpërndarja e gazetës Washington Post – momenti vendimtar erdhi me takimin e tij me Benjamin Graham, profesor në Columbia University dhe autor i librit klasik The Intelligent Investor. Nga ai mësoi “margjinën e sigurisë” dhe disiplinën e investimit, por më vonë Buffett zhvilloi një qasje të vetën: më shumë cilësore se sasiore, duke preferuar të blinte kompani të shkëlqyera me çmime të drejta, sesa biznese mesatare me çmime shumë të ulëta.
Epoka e Berkshire Hathaway
Në vitet ’60, Buffett mori kontrollin e Berkshire Hathaway, atëherë një kompani tekstilesh në krizë. Edhe pse më vonë e quajti këtë blerje një nga gabimet e tij më të mëdha, ky “dështim” u kthye në themelin e suksesit: ai e shndërroi Berkshire në një gjigant investimesh, duke futur nën ombrellën e saj kompani si Coca-Cola, American Express, BNSF Railway dhe, mbi të gjitha, Apple.
Sot, Berkshire është simbol i kapitalizmit të durimit dhe i investimeve afatgjata, duke reflektuar parimin e tij të famshëm: “Çmimi është ajo që paguan, vlera është ajo që merr”.
Suksese dhe gabime
Përveç sukseseve gjigante, Buffett ka pranuar edhe gabimet e tij. Rasti më i famshëm është blerja e kompanisë Dexter Shoe në vitin 1993, një marrëveshje që ai e quajti “gabimi më i tmerrshëm”. Kriza e globalizimit e rrëzoi biznesin, ndërsa aksionet e Berkshire të përdorura për blerjen sot do të vlenin mbi 18 miliardë dollarë. Ky rast e bëri Buffett të vendoste një nga rregullat e tij të arta: të shmangë financimin e blerjeve me aksione të kompanisë.
Njeriu pas pasurisë
Edhe pse me një pasuri të vlerësuar mbi 160 miliardë dollarë, Buffett ka mbetur njeriu i thjeshtë i Omahas: jeton në të njëjtën shtëpi që bleu në vitin 1958, ha mëngjesin në McDonald’s dhe vozit vetë Cadillac-un e tij.
Por madhështia e tij nuk qëndron vetëm tek pasuria. Çdo vit, në takimin e aksionerëve në Omaha – i njohur si “Woodstock i kapitalizmit” – mijëra vetë shkojnë për ta dëgjuar. Thëniet e tij janë bërë ligje të pashkruara për botën e investimeve, si ajo e famshmja: “Keni frikë kur të tjerët janë lakmitarë dhe jini lakmitarë kur të tjerët kanë frikë”.
Filantropia dhe trashëgimia
Me nismën Giving Pledge, së bashku me Bill dhe Melinda Gates, Buffett ka premtuar të dhurojë pjesën më të madhe të pasurisë së tij për bamirësi. Ky gjest e shndërron historinë e tij në një parabël morale, jo vetëm ekonomike.
Edhe pse ka qenë mbështetës i politikanëve demokratë si Barack Obama dhe Hillary Clinton, ai ka refuzuar çdo rol qeveritar, duke preferuar të mbetet një zë i pavarur. Madje ka denoncuar publikisht paradoksin e sistemit tatimor amerikan, duke theksuar se paguan më pak përqindje taksash se sekretarja e tij.
“Sekreti i Orakullit të Omahas”
Ndoshta sekreti më i madh i Buffett nuk është vetëm durimi dhe intuita e tij e jashtëzakonshme në investime, por edhe përulësia, ironia dhe aftësia për ta kthyer pasurinë në një mësim për brezat e ardhshëm.
Në moshën 95-vjeçare, Warren Buffett mbetet jo vetëm “investitori më i madh në botë”, por edhe tregimtari më i besueshëm i kapitalizmit amerikan./L.F-dritare.net
