Ish-presidenti francez Nicolas Sarkozy fajtor për financim të paligjshëm nga Gaddafi
E Enjte 25 Shtator 2025, 11:11
Dritare.net
Parisi – Ish-presidenti francez Nicolas Sarkozy është shpallur fajtor për komplot kriminal në një çështje që lidhet me marrjen e miliona eurove fonde të paligjshme nga ish-lideri libian Muammar Gaddafi.
Gjykata penale e Parisit e ka liruar nga të gjitha akuzat e tjera, duke përfshirë korrupsionin pasiv dhe financimin e paligjshëm të fushatës zgjedhore. Sarkozy, i cili e konsideron çështjen të motivuar politikisht, akuzohej se kishte përdorur fondet nga Gaddafi për të financuar fushatën e tij zgjedhore të vitit 2007. Prokuroria pretendonte se në këmbim, Sarkozy kishte premtuar të ndihmonte Gaddafin të përmirësonte reputacionin e tij ndërkombëtar.
Hetimi për këtë rast u hap në vitin 2013, dy vjet pas akuzave të para të djalit të Gaddafit, Saif al-Islam, i cili pretendonte se Sarkozy kishte marrë miliona nga i ati i tij për fushatën. Në vitin 2014, biznesmeni libanez Ziad Takieddine, që ka shërbyer për vite si ndërmjetës mes Francës dhe Lindjes së Mesme, deklaroi se kishte prova të shkruara që fushata e Sarkozy-t ishte financuar nga Tripoli, me pagesa që vazhduan edhe pas marrjes së presidencës.
Bashkëshortja e Sarkozy-t, Carla Bruni-Sarkozy, e akuzuar vitin e kaluar për fshehje të provave dhe bashkëpunim me të për të kryer mashtrim, i mohon të gjitha akuzat.
Që nga humbja në zgjedhjet e vitit 2012, Sarkozy ka qenë objekt i disa hetimeve penale. Ai gjithashtu ka apeluar një vendim të shkurtit 2024, që e gjeti fajtor për shpenzime të tepërta gjatë fushatës së rizgjedhjes së vitit 2012 dhe për punësimin e një firme PR për të mbuluar shpenzimet, për të cilën mori një dënim prej një viti, ku gjysma e tij u pezullua.
Në vitin 2021, Sarkozy u shpall fajtor për tentativë ryshfeti ndaj një gjyqtari dhe u bë presidenti i parë francez që mori një dënim me burg. Në dhjetor, gjykata e apelit të Parisit vendosi që ai mund të vuajë dënimin në shtëpi duke mbajtur një pajisje vëzhgimi.
