Trump akuzon për sabotim të trefishtë, në Kombet e Bashkuara, kërkon hetim zyrtar
E Enjte 25 Shtator 2025, 08:08
Dritare.net
Presidenti i SHBA-së, Donald Trump, ka kërkuar një hetim të plotë pas incidenteve teknike që ai i përshkroi si “sabotim të trefishtë” gjatë vizitës së tij në Asamblenë e Përgjithshme të OKB-së në Nju Jork, të martën.
Në një postim në rrjetin e tij social Truth Social, Trump tha:
“Një TURP i vërtetë ndodhi dje në Kombet e Bashkuara — jo një, jo dy, por tre ngjarje shumë të dyshimta!”
Incidentet
Sipas presidentit, problemet nisën me ndalimin e papritur të një shkallë lëvizëse, ku ai dhe zonja e parë Melania Trump rrezikuan të rrëzoheshin. Më pas, telepromteri nuk funksionoi në fillim të fjalimit të tij, dhe gjatë gjithë seancës pati ndërprerje audio, që sipas Trump, e bëri të pamundur dëgjimin e fjalimit pa kufjet e përkthimit.
Trump i cilësoi këto probleme si të qëllimshme, duke iu referuar edhe një raporti të gazetës britanike The Times, sipas të cilit disa punonjës të OKB-së kishin bërë shaka se do t’i fiknin shkallët dhe ashensorët gjatë vizitës së tij. “Kjo ishte absolutisht sabotim. Personat përgjegjës duhet të arrestohen!” tha ai.
Reagimi i OKB-së
Zëdhënësi i Sekretarit të Përgjithshëm të OKB-së, Stéphane Dujarric, deklaroi se është urdhëruar një hetim i brendshëm dhe se OKB është e gatshme të bashkëpunojë plotësisht me autoritetet amerikane. Sipas tij, ndalimi i shkallës lëvizëse u shkaktua nga një mekanizëm sigurie që mund të jetë aktivizuar aksidentalisht nga një videograf i delegacionit amerikan.
Ndërsa për telepromterin, palët kanë hedhur fajin te njëra-tjetra: OKB tha se ishte përgjegjësi e Shtëpisë së Bardhë, ndërsa zyrtarët amerikanë fajësuan aparaturën e vendosur nga Kombet e Bashkuara.
Kërkesa e SHBA-së
Ambasadori amerikan në OKB, Mike Waltz, tha se misioni amerikan ka dorëzuar kërkesa zyrtare për hetim tek Sekretari i Përgjithshëm António Guterres, duke përfshirë ruajtjen e pamjeve të sigurisë dhe shpjegime për problemet teknike.
“SHBA nuk do të tolerojë kërcënime ndaj sigurisë apo dinjitetit tonë në forumet ndërkombëtare,” shkroi Waltz në platformën X, duke i quajtur incidentet “të papranueshme dhe simptomë e një institucioni të dështuar”.
Edhe Shtëpia e Bardhë e mbështeti këtë qëndrim, duke ngritur dyshime se incidentet mund të kenë qenë të qëllimshme. Sekretarja e shtypit, Karoline Leavitt, shkroi: “Nëse dikush në OKB e ndali qëllimisht shkallën lëvizëse, duhet të pushohet dhe të hetohet menjëherë.”/L.F-dritare.net
