Presidenti francez Emmanuel Macron njoftoi të hënën se Franca ka njohur zyrtarisht shtetin e Palestinës. Ai bëri thirrjen për paqe dhe lirimin e të gjithë pengjeve të mbetura nga Hamas gjatë një fjalimi në OKB.
“Ka ardhur koha. Prandaj, duke iu përmbajtur angazhimit historik të vendit tim për paqen në Lindjen e Mesme mes izraelitëve dhe palestinezëve, shpall se sot Franca njeh shtetin e Palestinës,” tha Macron në samitin që po mbahet në Nju-Jork.
Para shpalljes së njohjes, Macron u drejtua me një mesazh të fuqishëm për OKB-në: “Nuk mund të presim më.” Ai kërkoi ndalimin e luftës në Gaza dhe lirimin e 48 pengjeve të mbajtura nga Hamasi. Macron theksoi se bota është vetëm disa çaste larg nga humbja e mundësisë për paqe dhe shtoi: “Asgjë nuk e justifikon luftën e vazhdueshme; gjithçka na detyron ta çojmë atë në fundin përfundimtar.”
Ky vendim vjen pas njohjes zyrtare të Palestinës nga Britania, Kanadaja, Australia dhe Portugalia të dielën, një hap që ka shkaktuar kritika të forta nga Izraeli. Pritet që edhe disa vende të tjera të shpallin mbështetjen e tyre gjatë ditës së hënë./K.C/dritare.net
