Starmer shpall sot njohjen e shtetit palestinez nga Mbretëria e Bashkuar
E Diel 21 Shtator 2025, 09:09
Dritare.net
Kryeministri britanik Sir Keir Starmer pritet të shpallë sot njohjen zyrtare të shtetit palestinez, një ndryshim historik në politikën e jashtme të Mbretërisë së Bashkuar. Ai kishte paralajmëruar se Londra do të vepronte nëse Izraeli nuk pranonte armëpushim në Gaza dhe një proces paqeje për zgjidhjen me dy shtete.
Vendimi ka shkaktuar kritika të ashpra nga Izraeli, i cili e quan “shpërblim për terrorizmin”, si dhe nga familjet e pengjeve që ende mbahen nga Hamasi. Qeveria britanike thotë se po vepron për të mbajtur gjallë shpresat për paqe, duke përmendur përkeqësimin e situatës humanitare në Gaza dhe zgjerimin e vendbanimeve izraelite në Bregun Perëndimor.
Palestina njihet tashmë nga rreth 75% e vendeve anëtare të OKB-së, por shteti i ardhshëm ende nuk ka kufij apo sovranitet të plotë, duke e bërë këtë hap kryesisht simbolik. Britania i bashkohet kështu vendeve si Spanja, Irlanda dhe Norvegjia, që kanë ndërmarrë tashmë veprime të ngjashme./K.C/dritare.net
