Presidenti amerikan Donald Trump deklaroi sot se po formësohet një marrëveshje e rëndësishme që synon t’i japë fund konfliktit të përgjakshëm në Rripin e Gazës. Në një prononcim për mediat, Trump tha se bisedimet e zhvilluara mes palëve kanë dhënë rezultate pozitive dhe se “duket sikur kemi një marrëveshje për Gazën”, e cila, sipas tij, do të sigurojë kthimin e pengjeve dhe do të çojë drejt përfundimit të luftimeve.
“Ky është një hap i madh përpara për paqen dhe stabilitetin në rajon,” u shpreh Presidenti, duke shtuar se prioriteti i Shteteve të Bashkuara mbetet sigurimi i jetëve të qytetarëve të pafajshëm dhe kthimi sa më shpejt i pengjeve te familjet e tyre. Megjithatë, Trump nuk dha detaje mbi përmbajtjen e marrëveshjes apo afatet e zbatimit të saj, duke theksuar se bisedimet ende po vazhdojnë dhe se çdo hap kërkon kujdes diplomatik.
Nëse marrëveshja konfirmohet, ajo pritet të hapë rrugën për rifillimin e dialogut politik dhe ndihmën humanitare, duke u dhënë shpresë miliona banorëve të rajonit për një të ardhme më të qetë./K.C/dritare.net
