Todi Llupi jashtë skenës: Familja, puna dhe jeta në fshat
Saturday 15 August 2026, 10:10
Dritare.net
Në episodin e 71-të të “Dritare TV”, kamera e gjyshit nga Stefan Gajo sjell një rrëfim të veçantë për aktorin e njohur të Teatrit të Fierit, Todi Llupi.
Larg skenës dhe dritave të teatrit, Llupi shfaqet në një tjetër dimension të jetës së tij, mes familjes, miqve dhe komunitetit. Kamera e ndjek gjatë një dite pune, teksa të afërmit dhe miqtë janë mbledhur për të hedhur betonin e shtëpisë së tij të re.
Përtej profesionit të aktorit, rrëfimi zbulon edhe anën familjare të Todit. Nëna e tij tregon për përgjegjësitë që ai ka marrë që në moshë të re dhe për përkushtimin ndaj familjes dhe vëllezërve.
Vetë Todi e sjell historinë me humor, duke treguar për jetën në fshat, familjen dhe kujdesin për bagëtitë. Me batuta dhe thjeshtësi, ai dëshmon se jeta e një artisti jashtë skenës mund të jetë po aq interesante sa rolet që ka interpretuar.
Ky episod sjell një portret njerëzor të një prej figurave të njohura të Teatrit të Fierit, duke treguar se pas aktorit që publiku njeh në skenë qëndron një njeri i lidhur fort me familjen, punën dhe komunitetin.
“Kamera e gjyshit” e Stefan Gajos na kujton edhe një herë se historitë më të bukura shpesh gjenden në jetën e përditshme, larg dritave dhe duartrokitjeve të skenës./L.F-dritare.net
