Pas vizitës në qytetin antik të Amantias, udhëtimi i gazetarit dhe fotografit anglez Robert Hackman vijoi në restorantin "Shpella Vajzë", ku u takua me Çlirimin një nga mjeshtrat e prodhimit të kaçkavallit tradicional. Pikërisht aty nisi një udhëtim në zemër të procesit të përpunimit të një prej produkteve më të njohura të gastronomisë shqiptare.
Çlirim Hitaj e shoqëroi gazetarin anglez në sallën e përpunimit, duke i treguar hap pas hapi të gjithë procesin e prodhimit të kaçkavallit, që nga përzgjedhja e qumështit të deles deri te maturimi i djathit. Ai shpjegoi se cilësia e produktit nis nga lënda e parë, ndaj për këtë kaçkavall përdoret vetëm qumështi i deleve që kullosin në kodrat përreth Amantias.
Gjatë vizitës, Robert Hackman pa nga afër pasterizimin e qumështit në 67 gradë Celsius, formimin e masës së djathit, ndarjen e hirrës që përdoret për prodhimin e gjizës, si dhe procesin e kripëzimit dhe maturimit, i cili zgjat deri në një vit. Çlirim Hitaj shpjegoi se çdo fazë kërkon saktësi dhe përvojë, pasi edhe një gabim i vogël mund të ndikojë në cilësinë e produktit përfundimtar.
Për gazetarin anglez, vizita në "Shpella Vajzë" ishte një mundësi për të zbuluar se pas çdo forme kaçkavalli fshihet një proces i gjatë pune, mjeshtërie dhe tradite, që vazhdon të ruhet me përkushtim në zemër të zonës së Amantias./E.P-dritare.net
